Actualidade

Saúdo do alcalde polas festas da Guadalupe

2025-09-11T06:37:37Z

Queridos veciños e veciñas de Rianxo, con gran ilusión escribo, un ano máis, unhas breves liñas para darvos a benvida a un dos momentos máis esperados do ano.

"Que significan para Rianxo as Festas da Guadalupe?", pregúntanme estes días dende diferentes medios de comunicación. A Guadalupe é máis que unha festa, é a materialización dun sentimento de orgullo polo noso pasado, pola nosa tradición e pola nosa identidade como rianxeiros e rianxeiras.

A emoción que calquera de nós sinte cantando o "Pájaro Pinto" na Ribeira ou "A Rianxeira" baixo a luz das bengalas é o froito dese sentimento. Unha emoción contaxiosa e que fai que calquera persoa que se achega a Rianxo para desfrutar das festas se sinta como un veciño ou unha veciña máis.

Estas son unhas festas tradicionalmente familiares e tranquilas, e así desexo que sigan sendo. Pídovos que desfrutedes delas coa máxima ledicia, mais tamén con moderación e con empatía cara as persoas que durante os días festivos seguirán traballando para todos e para todas ás que aproveito para lles agradecer a súa dedicación.

Un agradecemento que quero facer extensivo, por suposto, a todas as persoas da organización polo traballo que levan a cabo durante todo o ano e que se traduce nun intenso programa festivo que encherá de vida as nosas rúas.

Os meus mellores desexos para estas festas e que para o ano próximo non nos falte ninguén.

Que viva Rianxo e que bote o Xixí!

Consellos para o consumo responsable da auga

2025-08-04T08:31:59Z

Nas últimas semanas estase a rexistrar unha situación de escaseza de recursos hídricos que, aínda que non é crítica, leva ás autoridades e entidades xestoras a facer un chamamento á cidadanía para adoptar boas prácticas no consumo da auga da rede pública.

Segundo a información publicada pola Xunta de Galicia, non hai activadas alertas nin pre-alertas por seca na nosa demarcación hidrográfica. Con todo, a evolución hidrolóxica está a ser seguida con atención, e recoméndase aplicar medidas de aforro no uso doméstico da auga.

Estas recomendacións non implican, polo momento, a implantación de restricións nin prohibicións, mais pretenden sensibilizar a poboación e preparar o terreo ante posibles medidas futuras. Se a seca se agrava e se activa algunha fase de pre-alerta ou alerta por parte da Xunta, os concellos poderían adoptar disposicións adicionais, como a limitación de regos, baldeos ou o uso de duchas públicas.

Dende as entidades xestoras apélase á responsabilidade colectiva para facer un uso eficiente e sostible da auga, un recurso esencial que require do compromiso de todos e todas.

Festas da Guadalupe 2024

2024-08-20T15:23:44Z

A Asociación A Moreniña organiza as Festas da Guadalupe 2024, do 13 ao 20 de setembro.

O Concello de Rianxo colabora nas celebracións, que inclúen varios actos institucionais, como o Día de Padrón, o Día das Persoas Maiores ou a Procesión Marítima.

O programa completo está dispoñible na web específica das Festas da Guadalupe, https://festasdaguadalupe.gal/

Declaración responsable para as fogueiras de San Xoán

2024-06-03T12:17:20Z

Se tes pensado facer unha fogueira na noite de San Xoán, xa podes solicitar a autorización necesaria.

Deberás presentar na Policía Local unha declaración responsable debidamente cuberta. Poderás recoller o modelo na propia oficina da Policía Local ou descargalo aquí.

O prazo para presentar as solicitudes remata o 21 de xuño ás 9:00 h

Clausura do Obradoiro dual de emprego Pazo de Rianxiño

2023-11-03T12:25:33Z

O pasado martes día 31 de outubro, clausurouse o Obradoiro dual de emprego Pazo de Rianxiño, coa presenza do xefe territorial da Consellería de Promoción do Emprego e Igualdade, Pedro Pablo Lorenzo Díaz e o alcalde de Rianxo, Julián Bustelo Abuín.

Este obradoiro formou a 15 persoas nos certificados de Instalación e mantemento de xardíns e zonas verdes (AGAO0208) e Actividades auxiliares na conservación e mellora de montes (AGAR0309).

A parte práctica dos certificados desenvolveuse maioritariamente no Pazo de Rianxiño, onde se realizaron labores de deseño e implantación de novos espazos axardinados coas premisas de baixo mantemento e mellora das condicións de accesibilidade. Igualmente na Senda Litoral de Taragoña realizáronse traballos de roza e clareo, mellorando as condicións do tránsito dos sendeiristas.

Festas da Guadalupe de Rianxo 2023

2023-08-28T12:35:50Z

A Asociación A Moreniña, en colaboración co Concello de Rianxo, organiza as festas da Guadalupe 2023, que este ano conmemoran os 250 anos da chegada da imaxe da virxe de Guadalupe, a Moreniña, a Rianxo.

O programa das festas pódese consultar no sitio web https://festasdaguadalupe.gal/ e seguir aa ctualidade nas redes sociais Facebook (https://www.facebook.com/guadaluperianxo/ ) e Instagram (https://www.instagram.com/guadaluperianxo/ )

Xornada de limpeza e concienciación ambiental

2023-08-25T11:38:23Z

Ás 9:00 da mañá foi á hora en que o xoves 17 estaban convocadas todas as persoas interesadas en participar nesta iniciativa do Obradoiro de Emprego que se está a desenvolver dende o Concello de Rianxo co obxectivo de mellorar a saúde ambiental deste espazo tan concorrido e próximo á vila para así promover a conciencia dos veciños e visitantes sobre as consecuencias do lixo mariño.

As 18 persoas participantes organizáronse para a recollida dos residuos nos diferentes espazos de areal, rochas e senda durante a xornada cun total de 2.660m de liña costeira recorridos e que se dilataron ata as 14:00h co resultado de máis dunha tonelada de residuos extraídos.

Destacan os residuos procedentes de acuicultura tales como cordas, redes, nasas, bandexas de cultivo, flotadores e demais útiles variados utilizados nesta actividade económica propia das vilas do litoral da Ría de Arousa.

Outra parte importante do volume de residuos procede de envases de bebidas e comida abandonados polos visitantes do espazo, así como obxectos voluminosos e variados procedentes de vertidos incontrolados puntuais.

A recuperación deste espazo liberándoo de lixo supón poñer á disposición da cidadanía un área de grande valor ambiental e paisaxística, que dende o Obradoiro Dual de Emprego “Pazo de Rianxiño” agardan sexa lugar predilecto de desconexión e práctica de deporte para rianxeiros e visitantes.

Limpeza da senda litoral de Taragoña

2023-08-11T10:48:08Z

O vindeiro día 17 de agosto, xoves, o Obradoiro Dual de Emprego Pazo de Rianxiño ten previsto realizar unha saída para recollida de lixo dende a Praia da Torre e camiño da Senda Litoral ata o Porto de Taragoña.

O horario será das 9:00h ata as 12:00h e o punto de partida será o inicio da Praia da Torre.

Esta actividade está aberta a todo aquel que queira colaborar.

Visita didáctica ao Festival Internacional de Xardíns de Allariz do alumnado do Obradoiro Dual de Emprego Pazo de Rianxiño

2023-07-12T08:54:32Z

O pasado día 4 de xullo o alumnado-traballador do Obradoiro Dual de Emprego Pazo de Rianxiño, acompañado de membros do equipo docente e de apoio, realizaron unha visita didáctica ao Festival Internacional de Xardíns de Allariz.

Entre as actividades previstas respecto ao Certificado de Profesionalidade AGAO0208 “Instalación e mantemento de xardíns e zonas verdes”, que se está impartindo nestes momentos a 15 persoas do concello de Rianxo, están as visitas a espazos axardinados nos que se poidan apreciar persoalmente os contidos desenvolvidos nas materias estudadas.

A celebración do Festival Internacional de Xardíns de Allariz na súa XIII edición ofrece a oportunidade de coñecer, nunha soa xornada, unha colección de creacións que son mostra das tendencias conceptuais, ademais da utilización de novos recursos técnicos e de diversos materiais tanto inertes como vexetais.

Dotación de Ascensor ao Centro Cultural de Taragoña

2023-06-15T08:06:05Z

O Concello de Rianxo vén de asinar coa empresa CONSTRUCCIONES ANSPAL, SL a execución do proxecto de construción dun ascensor para o Centro Cultural de Taragoña e outras melloras no edificio. O proxecto forma parte do Plan Provincial de Cooperación ás obras e servizos de competencia municipal.

Este proxecto conta cun Orzamento total de execución por contrata de 98.343,17 € e mellora a accesibilidade global do edifico que non dispoñía de facilidades para ao acceso de persoas con discapacidade e que a partir desta actuación poderán acceder ás dúas plantas do Centro Cultural. Isto axudará á revitalización do espazo ao facilitar o uso de toda a instalación para todas as persoas, incluídas as aulas de alfabetización de adultas do Concello que alí acudían.

O prazo de execución é de 3 MESES. A execución do contrato comenzará coa sinatura da acta de comprobación do replanteo. Preténdese realizar as obras durante o verán, ao remate do curso escolar da Unitaria Rosalía de Castro e rematalas antes do novo inicio para non molestar a actividade docente.

Traballos de adecentamento da senda litoral de Taragoña polo Obradoiro Dual de Emprego Pazo de Rianxiño

2023-06-05T13:20:51Z

O día 25 de maio o Obradoiro Dual de Emprego Pazo de Rianxiño, iniciou os traballos de adecentamento da Senda Litoral de Taragoña.

Actuarase principalmente nos lugares da Posta e do Porto.

Estes traballos consisten en roza de maleza e saneamento das especies existentes a conservar a modo de rareas e podas.

Aconséllase que se evite pasear pola zona en horario de traballo, pero se o fan que tomen as medidas de precaución necesarias, transitando por zonas despexadas e mantendo a distancia de seguridade dos traballos.

Comezan as obras da Base Operativa antiincendios da Xunta en Rianxo en Té

2023-05-16T09:25:02Z

Tras a cesión por parte do Concello de Rianxo dunha parcela de equipamento municipal á Xunta de Galicia e a licenza de obras ao proxecto de Medio Rural no Parque Empresarial de Rianxo deron comezo as actuacións previstas.

Estas están contidas no Proxecto Básico e de Execución de Base Integrada de Unidades Operativas (BUO) de Rianxo no que é a primeira base operativa na comarca. As máquinas comezaron a actuar no parque empresarial coa fase inicial de explanación do recinto que albergará este equipamento especializado na loita antiincendios forestais.

O proxecto presenta un orzamento de 441.391,55 euros e un prazo de execución de seis meses. Entre os obxectivos deste equipamento inclúese o de converterse nun espazo adicado á defensa do monte, pero tamén nunha contorna referencial (medioambiental e construtivamente falando) no Parque Empresarial de Rianxo,

Este contedor de servizos de protección forestal será un lugar de descanso e traballo dos brigadistas e desde aquí accederán aos operativos que xurdan e que terán unha grande vantaxe pola proximidade á autovía e outras estradas na bisbarra. Desde a base poderán incorporarse loita contra os incendios con grande rapidez.

Lembramos que na construción se apostou por reducir ao mínimo o impacto da edificación, o uso de madeiras como o castiñeiro e piñeiro, ou a cuberta axardinada. Unha construción quilómetro cero no que se procurou a eficiencia enerxética en todas as instalacións, con sistema de climatización por aerotermia e sistemas de control e regulación para as luminarias LED.

O Alcalde Adolfo Muíños lembra a boa disposición municipal para ceder esta parcela consciente de que é un equipamento que traerá un beneficio directo como é achegar a Rianxo os operativos que por desgraza son imprescindíbeis polos incendios do propio concello e da bisbarra. Tamén por crear infraestruturas de referencia supramunicipais no municipio.

Actos polo 1º de maio, día da xente do mar

2023-04-28T12:04:03Z

O Concello de Rianxo homenaxea, como é habitual o primeiro de maio, á xente do mar, cunha ofrenda floral ante o monumento ás persoas falecidas no mar do Parque de Galicia e unha ofrenda floral marítima.

Vía libre para a base de Medio Rural en Rianxo

2023-04-12T07:58:32Z

A Xunta de Goberno do Concello de Rianxo deu na xuntanza extraordinaria celebrada o martes 11 de abril deu vía libre á solicitude presentada pola Axencia Galega da Industria Forestal da Xunta de Galicia, na que se solicitaba licenza municipal para as obras contidas no Proxecto Básico e de Execución de Base Integrada de Unidades Operativas (BUO) de Rianxo.

Este proxecto que se vai desenvolver nunha parcela de equipamentos no Parque Empresarial cedida polo Concello de Rianxo a Medio Rural implicará a construción dunha base contra incendios forestais permanente no que é a primeira base operativa na comarca.

Presenta un orzamento de 441.391,55 euros para desenvolver este proxecto e un prazo de execución de seis meses. Entre as características deste equipamento sinala que se crea un espazo adicado á defensa do monte, pero tamén coa vontade de converterse nunha das iconas do Parque Empresarial de Rianxo polos materiais empregados e por minimizar o impacto da edificación prevendo futuras ampliacións..

Trátase de xerar un contedor de servizos de protección forestal, que poda funcionar como nodo de todos os axentes participantes neste labor, favorecendo a conciliación entre descanso e traballo dos brigadistas, pero sen esquecer a integración nunha contorna tan sensible.

Para minimizar o impacto da edificación, optouse por fragmentar o seu volume, en tres ás diferenciadas, unha aberta, e outras dúas consistentes nuns volumes pechados. Tamén polo uso do castiñeiro e piñeiro como elementos construtivos ou a cuberta axardinada ou as cores que se empregarán.

Outro dos mecanismos de integración é a inclusión de parasois emparrados e que voan sobre a paisaxe, minimizando o impacto do soleamento na área de comedor e descanso.

Pegada de carbono negativa

Ademais de procurar unha construción quilómetro cero, empregando sistemas construtivos e materais de proximidade, coa construción en madeira, obtense unha pegada de carbono negativa.

Ademáis da propia construción, a eficiencia enerxética en tódalas instalacións, con sistema de climatización por aerotermia, recuperadoras de calor, e sistemas de control e regulación para as luminarias LED.

Unanimidade nos acordos en materia de persoal en Rianxo

2023-04-03T08:07:16Z

O Pleno Ordinario do último xoves de marzo do Concello de Rianxo recolleu a aprobación por unanimidade de importantes documentos referidos ao persoal municipal. Así, viron luz verde do pleno o Convenio Colectivo para o persoal laboral, o Acordo Regulador para o persoal funcionario, e dous Regulamentos: o de Teletraballo e o de Segunda Actividade.

O Comité de Empresa e a representante do funcionariado tomaron a palabra no pleno para expresar o seu agradecemento pola boa disposición negociadora na parte empresarial, neste caso representada polo alcalde. Esta amosouse sempre desde a disposición para a aprobación en Mesa Negociadora primeiro e no pleno despois, así como tamén hoxe dos partidos políticos que constitúen o Pleno para amosar o respaldo ás normas que se aprobaron que regulan dereitos e deberes en materia laboral. Logo da súa aprobación serán publicadas no Boletín da Provincia (BOP). Avogaron por seguir con este clima de confianza e traballo para acadar un dos documentos que resta para o cadro de persoal como é a RPT.

O alcalde tomou a palabra para recoller esta vontade de continuar a traballar neste camiño e quixo expresar o importante destes acordos aprobados. Sen dúbida o que ten que ver co convenio e acordo, básicos na relación laboral nunha empresa, homologando a todo o cadro de persoal, mais tamén fixo fincapé nos dous regulamentos que dan garantías para o teletraballo e moi especialmente no que ten que ver coa chamada segunda actividade.

O regulamento de segunda actividade permite manter a relación laboral co Concello nun posto diferente do de entrada cando sobreveñen situacións físicas ou doutro tipo que impiden o normal funcionamento da súa actividade, evitando así xubilacións prematuras que dan lugar a unha quita importante dos recursos económicos dos traballadores. Estes poderán ir a outro traballo acorde coa súa nova situación e onde poidan desenvolver actividades menos esixentes no físico como conserxerías, atención ao público, uxieres, administrativas, entre outras. Postos de relevancia e utilidade tamén que se acomoden ás súas posibilidades. Isto, que na medida do posíbel xa se estaba a dar con varias persoas do Concello, adquire unha norma que a xeneraliza no caso do Concello.

O alcalde deu tamén as grazas aos representantes dos traballadores pola súa implicación na redacción dos textos, mais tamén na súa profesionalidade e dedicación, ás veces en situacións complexas como a destes anos da pandemia. O regulamento de teletraballo, adaptado a partir do da Xunta de Galicia para o seu persoal, será outra das guías de actuación nese campo a partir de agora.

Nos apartados de Mocións foron aprobadas por unanimidade as presentadas, algunha con pequenos trocos froito da negociación in voce (no propio pleno). Catro foron as presentadas por Rianxo en Común, unha do propio BNG e outra que se converteu en Declaración Institucional. Son as seguintes:

Cobertura dun segundo pediatra no Centro de Saúde de Rianxo
Remate de beirarrúas na AC305 entre A Casilla e As Pedriñas máis a inclusión de seguridade vial en Campo de Pazos (Taragoña) seguindo o modelo elaborado pola Fundación RIA.
Solicitar da Xunta medidas de recuperación do estado xeral da ría de Arousa eliminando verquidos
Petición de parada para escolares no Moroso na marquesiña existente.
Apoio á asociación de veciños do Araño na reclamación da reestruturación parcelaria.
Apoio á Iniciativa Lexislativa Popular para no Parlamento debatela no que atinxe á dignificación e recuperación do Himno Galego.

Plan piloto da Deputación da Coruña para crear unha residencia pública comarcal para maiores en Rianxo

2023-04-03T06:43:55Z

A Deputación da Coruña impulsa un plan piloto para crear unha rede de residencias públicas para maiores de ámbito comarcal. Serán residencias de pequeno tamaño e máis proximidade, con capacidade para unhas 50 persoas, "coas que pretendemos mellorar o benestar e evitar o desarraigo e a soidade non desexada dos maiores", que moitas veces vense na obriga de ir a residencias moi lonxe do seu fogar, así como "crear emprego e axudar a fixar poboación no rural", segundo explicou o presidente da Deputación, Valentín González Formoso.

Os primeiros centros ubicaranse nas Pontes, Rianxo e Ordes, segundo se recolle no protocolo asinado esta mañá polo presidente e alcalde das Pontes, Valentín González Formoso; o vicepresidente, Xosé Regueira; a deputada de Benestar Social, Ana Lamas, o alcalde de Rianxo, Adolfo Muíños e a concelleira de Política Social de Ordes, Susana García.

Formoso explicou que estes tres primeiros centros suporán un investimento de 6 millóns de euros e crearán 188 empregos. Os centros serán de titularidade e xestión pública, "un modelo alternativo ao da Xunta de Galicia, que conta cun 90% de residencias privadas, con tarifas moitas veces inasumibles para as familias e que ademais non creou nin unha soa praza pública de residencias nos últimos 14 anos", afirmou.

"Este é un proxecto no que levamos meses traballando. A Deputación ten feito unha diagnose dos servizos sociais da provincia no que detectamos unha eiva significativa de dotacións destinadas a maiores", explicou Formoso, que subliñou que "queremos arrancar este proxecto co consenso de todas as forzas políticas. É un proxecto de país", afirmou. O presidente destacou tamén que espera "colaboración institucional" por parte da Xunta e agradeceu a colaboración dos concellos de Rianxo, Ordes e As Pontes, que se encargarán de ceder os terreos e redactar os proxectos, mentres que a Deputación da Coruña asumirá cunha partida orzamentaria de 6 millóns de euros a execución das obras e posteriormente a xestión dos centros.

O vicepresidente da Deputación, Xosé Regueira, cualificou este proxecto piloto como "un modelo alternativo", baseándoo en tres factores: na cooperación entre administracións, na procura "dun modelo asistencial máis humano", e un modelo "máis acorde coas necesidades do noso territorio".

A este respecto, Regueira explicou que "entre os múltiples dramas que vivimos durante a pandemia un deles foi a situación residencial das persoas maiores", e que froito desa experiencia "a Deputación fixo unha análise de necesidades e sacamos as nosas propias conclusións".

Valoración do Alcalde de Rianxo

Unha satisfacción que se concrete deste xeito o traballo destes anos en prol dun servizo básico hoxe como é unha residencia pública, que deste xeito se poderá instalar no noso concello con ese carácter comarcal.

Valoro tamén positivamente que sexa a Deputación quen se implique na xestión futura deste equipamento, garantindo o seu desenvolvemento e funcionamento e aposte por manter como pública a residencia, tanto nas persoas que a atenderán como na cobertura das prazas.

Fago fincapé tamén no carácter plural da escolla dos concellos, no que debería ser o normal na instalación de servizos.

O Concello para materializar este proxecto cederá unha parcela urbanizábel na zona de Rianxiño, a carón do Instituto e, tal como se manifestou, recibirá unha cantidade duns 300.000 euros para licitar públicamente un concurso de redacción do proxecto. Tras iso será a propia Deputación quen licite as obras, constrúa e xestione a residencia.

En definitiva ledicia pola concreción deste proxecto e para o que traballaremos arreo para facilitar as tarefas da Deputación Provincial.

Peche perimetral do Colexio Brea Segade de Taragoña

2023-03-30T10:21:40Z

O Concello de Rianxo está a acometer unha fase máis do cambio do peche perimetral do Colexio Brea Segade de Taragoña. Neste caso adoptou un modelo novo de peche, con formigón que permite un repintado multicolor como neste caso. A solución á vez que segura para o alumnado dá un aspecto alegre e renovado a todo o frontal precisamente pola gama de cores empregada. Nestes momentos esta fase está practicamente rematada. Pola súa vistosidade reservouse este material para o frontal do Colexio co que adquire un novo aspecto.

Esta actuación completarase durante a Semana Santa co reasfaltado dunha zona de xogo e do aparcadoiro do centro, eliminando bordes da aceira e instalando tamén unha canalización de pluviais por medio dunha rexilla. Tamén se realizou unha limpeza da parte traseira para mellorar a zona de xogos e se prevé a instalación de elementos de xogos acorde á contorna natural

As actuacións realizadas están a correr a cargo integramente da Brigada de Obras do Concello que se implicou neste proxecto que cambiará ao completo un peche degradado co paso dos anos. Cando remate estes días a fase restarán uns 50 metros onde xa se adoptará un modelo de peche máis tradicional que se prevé acometer antes do remate do curso.

Proxecto remodelación Patio Cuberto

Con cargo ao plan único da Deputación sacarase á licitación pública o proxecto de remodelación do patio cuberto do Centro por 63.000 euros, proceso que quedou inconcluso pola negativa das empresas a realizalo e que se dota con 30.000 euros adicionais do Concello para chegar aos 93.000 euros co que será máis atractivo nun novo concurso de licitación.

Posta a punto dos areais municipais

2023-03-29T13:23:52Z

A brigada de obras do Concello de Rianxo vén de realizar estes días a primeira posta a puntos dos areais municipais tras os temporais do inverno.

Como vén sendo tradicional, esta actuación realízase antes da Semana Santa para que a veciñanza acceda a estes espazos. Procúrase na limpeza separar tamén os residuos plásticos dos orgánicos. Tanxil, Quenxo, A Torre, O Pazo, Porto de Taragoña e As Cunchas son as praias nas que se intervén.

Charla informativa sobre a creación dunha Comunidade Enerxética Local desde os edificios municipais do pavillón, piscina e vivendas dos mestres.

2023-03-27T12:03:59Z

O Concello de Rianxo pretende crear unha Comunidade Enerxética Local desde os edificios municipais do pavillón, piscina e vivendas dos mestres.

As comunidades enerxéticas son proxectos colectivos en que o Concello, xunto a persoas físicas e outras entidades se asocian para xestionar a propia enerxía.

Teñen como obxectivo fomentar a xeración renovable permitindo a participación directa das persoas no mercado eléctrico. Esta figura das comunidades enerxéticas é unha proposta da Unión Europea, que activa subvencións a través dos Fondos de Recuperación Transformación e Resiliencia para dar un forte impulso para a transición enerxética, sendo o autoconsumo e a participación colectiva un dos seus sinais de identidade.

Para avaliar o interese na creación dunha Comunidade Enerxética Local en Rianxo, así como a súa viabilidade técnica, xunto ao Concello que disporía dunha importante superficie de xeración que se instalaría nos tellados de edificios públicos, programouse para o martes 28 de marzo ás 19 h. no Auditorio Municipal unha charla informativa aberta a todos os veciños e veciñas.

Tras este encontro tomarase a decisión de conformar unha comunidade que ten os seus propios órganos asemblearios de toma de decisión e de busca do camiño a seguir.

Visita á Estación Fitopatolóxica do Areeiro e ao Centro de Investigación Forestal de Lourizán do alumnado do Obradoiro de Emprego Pazo de Rianxiño

2023-03-24T12:48:31Z

O alumnado-traballador do Obradoiro Dual de Emprego Pazo de Rianxiño, coa intención ampliar e completar a súa formación, visitou as instalacións da Estación Fitopatolóxica do Areeiro e o Centro de Investigación Forestal de Lourizán, ambas situadas en Pontevedra.

A Estación Fitopatolóxica Areeiro ten un alto prestixio no ámbito da sanidade vexetal, na investigación e experimentación sobre cultivos forestais, agrícolas e ornamentais, como a camelia, e na defensa e conservación do patrimonio vexetal. Conta con laboratorios dedicados ao diagnóstico e investigación das pragas e enfermidades dos vexetais, á edafoloxía e a estudos de cultivos. Conta asemade cunha colección de camelias de máis de 1.000 exemplares, xardín de aromáticas e outras especies vexetais que fai que sexa un xardín cun carácter didáctico moi interesante. A visita realizouse con guías especializados que explicaron o traballo que alí se realiza, así como o patrimonio que forman os seus xardíns.

O Centro de Investigación Forestal de Lourizán desenvolve proxectos de investigación en diferentes áreas forestais. Son pioneiros no desenvolvemento e posta en práctica de numerosos produtos e tecnoloxías forestais. Levan a cabo numerosos proxectos e ensaios forestais e conta así mesmo co xardín botánico máis importante de Galicia, con árbores incluídas no Catálogo de Galego de Árbores e Formacións Senlleiras de Galicia.

Tanto a Estación Fitopatolóxica Areeiro como o Centro de Investigación Forestal de Lourizán contan con contornas axardinadas de alto valor e de interese para ambos certificados.