Emprego

Territorio Emprende

2025-10-30T07:46:09Z

A Fundación Paideia Galiza pón en marcha unha nova edición de Territorio Emprende, un programa gratuíto de formación e acompañamento que busca promover o emprendemento colectivo e interxeracional no rural.

O programa está dirixido a persoas de todas as idades e formacións, o obxectivo é facilitar a creación de proxectos que xeren impacto positivo no territorio, a través de metodoloxías de co-creación, aprendizaxe colaborativa e traballo en rede.

Máis información e inscricións: https://www.paideia.es/territorio-emprende/

Programa Integrado de Emprego 2025-2026

2025-10-24T12:56:35Z

Os Concellos de Boiro, Rianxo e A Pobra reciben unha subvención da Consellería de Emprego, Comercio e Emigración unha subvención por importe de 220.000,00 euros para executar unha nova edición do Programa Integrado de Emprego para o curso 2025-2026.

Trátase dun programa que os tres concellos levan a cabo de forma conxunta co obxectivo de lograr unha maior empregabilidade na comarca. Baséase nunha metodoloxía innovadora onde as persoas usuarias son protagonistas da súa propia transición profesional con formación novidosa, emprego de tecnoloxías e plataformas dixitais, colaboración directa con empresas e adaptación do programa a necesidades locais e sectores da comarca.

O enfoque para o novo curso é dunha renovación case total das actividades formativas co obxectivo de adaptarse ás novas necesidades e demandas das empresas da zona. Deste xeito plantéxanse formacións como acompañamento en transporte escolar, organización de almacén, operacións básicas de caixa, técnicas e procedementos de limpeza en aloxamentos, xestión de recepción, cociña, pastelería, peixaría, charcutaría…

Ademais contará con formación adaptada ao manexo de novas tecnoloxías como office, iniciación á creación de páxinas web, firma dixital, chatGPT e intelixencia artificial…

O programa terá unha duración de 12 meses e poderán participar 100 mulleres e homes desempregados e inscritos como demandantes de emprego.

Como noutras edicións poñeranse a disposición das persoas usuarias servizos de conciliación, adaptación de horarios e tamén formación online para aumentar as posibilidades de interacción e participación.

Máis información para participar no programa no enderezo electrónico emprego@boiro.gal ou os números de teléfono 659 247 963 e 650 042 409.

Incentivos á contratación Obradoiro de Emprego MONTE NOSO

2024-10-31T13:45:19Z

O Concello de Rianxo convoca os incentivos para a contratación laboral temporal por conta allea a favor do alumnado/traballador do Obradoiro de Emprego MONTE NOSO.

Poderán ser entidades beneficiarias dos incentivos á contratación as persoas empregadoras e as empresas, calquera que sexa a forma xurídica que adopten, incluídas as persoas autónomas, as sociedades civís e as comunidades de bens, aínda que carezan de personalidade xurídica, cuxa actividade estea directamente relacionada coa formación impartida no Obradoiro dual de Emprego “MONTE NOSO”, é dicir, que a actividade estea relacionada coas especialidades, AGAR0208: Repoboacións forestais e tratamentos silvícolas ou AGAR0309: Actividades auxiliares e conservación e mellora de montes, e que contraten traballadoras ou traballadores por conta allea para prestar servizos en centros de traballo radicados no ámbito territorial da comarca da Barbanza.

As solicitudes de axudas polas contratacións subvencionables deberán presentarse no prazo de 5 días a contar desde o día seguinte á publicación da convocatoria no BOP.

Bases do programa de incentivos

ANEXO I

ANEXO II

Programa Integrado de Emprego dos Concellos de Boiro, Rianxo e A Pobra

2024-10-18T13:28:02Z

O Programa Integrado de Emprego 2024/2025 está destinado a 100 persoas da comarca inscritas como demandantes de emprego que, durante 12 meses, van recibir formación específica acorde aos sectores produtivos da zona así como xornadas destinadas a mellorar as habilidades de empregabilidade e inserción laboral.

Nesta edición a oferta formativa inclúe técnicas de limpeza e departamento de pisos; Eventos, cátering e banquetes; Cociña básica; Elaboración de pezas cárnicas; Preparación de peixes e mariscos para a industria e venda; Identificación de alérxenos e manipulación de alimentos; Condución de carretillas; Xestión e control de compras e stock; Operacións básicas de caixa; entre outras.

Ademais, durante o desenvolvemento do programa vanse levar a cabo accións de información, orientación e asesoramento laboral; formación en habilidades sociolaborais e en técnicas de busca efectiva de emprego; sesións de coaching; formación en idiomas e novas tecnoloxías; formación específica para o emprego; prospección de ofertas laborais e prácticas profesionais.

O Programa basease nunha metodoloxía innovadora que inclúe aspectos como unha metodoloxía adaptada ás necesidades das usuarias; uso de novas tecnoloxías para favorecer a comunicación coas usuarias; uso de redes sociais para conseguir unha mellor comunicación; uso de ferramentas TIC para a busca de emprego; networking e acompañamento.

As persoas participantes percibirán unha axuda consistente en 10 euros por día de asistencia ás accións do Programa. Ademais, os concellos ofrecen medidas de conciliación para favorecer a participación no Programa segundo as necesidades de cada persoa usuaria.

O Programa Integrado de Emprego 2024/2025 dos Concellos de Boiro, Rianxo e A Pobra está financiado pola Consellería de Emprego, Comercio e Emigración da Xunta de Galicia e o Ministerio de Traballo e Economía Social.

O Programa do curso 2023/2024, que tamén se levou a cabo de forma conxunta, está a piques de rematar e conta xa cunha inserción laboral de 58 persoas que atoparon traballo grazas a participar nas accións formativas.

Máis información para participar no programa no enderezo electrónico emprego@boiro.gal ou os números de teléfono 659 247 963 e 650 042 409.

O Concello de Rianxo informa das convocatorias de axudas ao emprendemento e fomento do emprego

2024-01-23T08:18:30Z

O Concello de Rianxo informa das diferentes convocatorias abertas para o fomento do emprego, que teñen por obxectivo contribuír non só ao emprendemento, senón tamén ao mantemento e ampliación dos postos de traballo e mesmo o investimento en bens necesarios para o desenvolvemento da actividade.

Nesa liña, na xornada de onte abriu o prazo de solicitude das Axudas PEL da Deputación da Coruña, que contan con catro liñas de actuación: investimentos; autónomas/os; creación e ampliación do cadro de persoal; e mantemento do cadro de persoal. Todas elas poderanse solicitar até as 14h do 22 de febreiro a través de https://emprego.dacoruna.gal/axudas

As Axudas PEL Investimento teñen por obxectivo contribuír á consolidación e ao fortalecemento do tecido empresarial nos concellos da provincia da Coruña con poboación inferior a 10.000 habitantes, a través do apoio ao investimento de bens inventariábeis de pequenas, medianas empresas, microempresas e persoas autónomas. Segundo está recollido nas bases, estes bens poden ser aplicacións informáticas, maquinaria, mobiliario ou equipos para os procesos de información.

Por outra banda, as liñas PEL Autónomas/os están dirixidas a sufragar parte das cotas da seguridade social da anualidade 2024 en concellos con poboación inferior a 20.000 habitantes, sempre e cando estas superen os 200 € mensuais.

Por último, as outras dúas convocatorias oriéntanse á contratación de persoal, unha delas destinada ás empresas, microempresas e persoas autónomas que precisan crear ou ampliar o cadro de persoal, e outra para o mantemento de postos de traballos indefinidos creados ao amparo da axuda PEL-Pemes Creación e Ampliación na anualidade 2023.

Tamén está aberta a convocatoria, até o 30 de setembro, unha liña de axudas para a promoción do emprego autónomo posta en marcha pola Consellaría de Promoción do Emprego e Igualdade, con axudas de entre 2.000 e 7.000 €, segundo diferentes casuísticas. Pode solicitarse na Sede Electrónica da Xunta mediante o procedemento TR341D

O Alcalde de Rianxo, Julián Bustelo, valorou positivamente estas axudas “que contribúen non só a que a xente poida emprender os seus negocios, senón tamén a fomentar a contratación e posterior mantemento do posto de traballo de outras persoas”, e lembrou a disposición do Concello de Rianxo para “resolver as dúbidas que poida ter a veciñanza interesada en solicitar estas axudas”.

Máis aló das axudas ligadas ao emprego, desde o Concello de Rianxo tamén informan de outras liñas de subvención que permanecen abertas, e que poden ser de interese para a poboación local:

O INEGA ten abertas dúas liñas de axudas para a renovación de electrodomésticos (IN414B e IN414C), mentres que a Axencia de Turismo de Galicia subvenciona actuacións de mellora das infraestruturas dos establecementos turísticos de aloxamento e restauración (TU503A). Finalmente, o Instituto de Estudos do Territorio, ofrece axudas para actuacións de corrección de impactos paisaxísticos (MT402A).

Xornada de portas abertas no Pazo de Rianxiño

2023-10-18T10:34:10Z

O vindeiro día 27 de outubro, realizarase unha xornada de portas abertas no Pazo de Rianxiño para para que o público poida ver as melloras realizadas na contorna do pazo polo alumnado do Obradoiro de Emprego.

Realizaranse visitas guiadas polo propio alumnado e unha pequena exposición fotográfica dos cambios realizados.

O horario será de 10.00 h a 12.00 h.

Obradoiro de emprego "PAZO DE RIANXIÑO"

2022-09-27T12:35:39Z

A Consellería de Promoción do Emprego e Igualdade da Xunta de Galicia concedeu unha subvención ao Concello de Rianxo para o desenvolvemento do OBRADOIRO DUAL DE EMPREGO PAZO DE RIANXIÑO.

O obradoiro irá destinado a 15 alumnos/as-traballadores/as, con contratos de formación dunha duración de 12 meses e o seu correspondente profesorado.

En vindeiras datas aprobaranse as bases de selección e publicaranse as diferentes convocatorias de selección do persoal de formación e de solicitudes do alumnado, onde se establecerán os prazos e requisitos para a inscrición.

O proceso de selección farase a través da oficina de emprego de Boiro, co cal é necesario:

Estar desempregado/a
Inscrito/a como demandante de emprego na oficina de emprego de Boiro
Comunicar na Oficina de Emprego de Boiro o interese na participación en obradoiros de emprego, OU ben solicitar a especialidade INSTALACIÓN E MANTEMENTO DE XARDÍNS E ZONAS VERDES a través da oficina virtual do servizo de emprego: https://emprego.xunta.es/openampro/UI/Login?goto=https://emprego.xunta.es/ofivir/group/speg_inicio/home
En caso de ter un IPI (Itinerario personalizado de inserción) aberto, contactar co orientador laboral do Concello para solicitar a alta no obradoiro
Ao tratarse dun certificado profesional de nivel 2, é necesario ter a titulación mínima da ESO, ciclo básico de FP, competencias clave de nivel 2 ou outros equivalentes (non vale só coa EXB ou graduado escolar)

O alumnado recibirá formación no ámbito da INSTALACIÓN E MANTEMENTO DE XARDÍNS E ZONAS VERDES que se centrarán nos xardíns e arborado do Pazo de Rianxiño e outros espazos distribuídos polo término municipal, contribuíndo ao seu mantemento e mellora, á vez que aprenden un oficio con amplas perspectivas de emprego.

Os traballos previstos abranguerán a conservación das árbores con valor ornamental, o acondicionamento de zonas axardinadas, a accesibilidade as mesmas pensando nas futuras usuarias e usuarios do centro de día. Tamén se eliminarán as especies danadas e, en xeral, o mantemento da finca durante un ano. Ademais, realizarase formación sobre sementeiras, plantacións, cortas, sistemas de rega e tratamentos fitosanitarios, entre outros.

Clausura do Obradoiro de Garantía Xuvenil Carnero Valenzuela II e presentación dos traballos de deseño web realizados

2021-09-28T13:32:07Z

O programa mixto de emprego e formación "Carnero Valenzuela II", dirixido a mellorar a ocupabilidade das persoas desempregadas mozas incluídas no Ficheiro do Sistema Nacional de Garantía Xuvenil, cofinanciado pola Iniciativa de Emprego Xuvenil da Xunta de Galicia e o Fondo Social Europeo, e promovido polo Concello de Rianxo, pon fin a 12 meses de formación e traballo coa presentación e entrega dos proxectos realizados polos 16 alumnos e alumnas do obradoiro e ante a presenza da Secretaria territorial da Coruña da Xunta, Patricia Rodríguez Franco, e o alcalde de Rianxo, Adolfo Muíños Sánchez.

O principal proxecto desenvolvido polo alumnado foi o Portal de Entidades de Rianxo (https://entidadesderianxo.gal/), un escaparate colaborativo do tecido asociativo do municipio.

Ademais desenvolveron outros proxectos de interese para a promoción de Rianxo:

Roteiro Castelao https://roteirocastelao.gal/

Ruta do Apego https://rutadoapego.rianxo.gal/

Faustino Rey Romero https://faustinoreyromero.gal/

Museo do Mar de Rianxo https://museodomarderianxo.gal/

Casa Museo de Manuel Antonio https://museomanuelantonio.gal/

Feito en Rianxo https://feitoenrianxo.gal/

Tríptico informativo: [Descargar PDF]

Nova liña de axudas para adaptar a produción das PeME's galegas á fabricación de material sanitario e de protección

2020-04-16T12:03:26Z

Co obxectivo de que as empresas galegas poidan reorganizar a súa produción cara a fabricación urxente de material sanitario e de protección, a Xunta aprobou unha liña de axudas dotada con 2,5 millóns de euros, cofinanciada a través do Programa Operativo Feder Galicia 2014-2020. O programa impulsará a reorganización produtiva para facer fronte á emerxencia sanitaria.

As axudas, de ata 100.000 € en concorrencia non competitiva, cubrirán o 75% dos investimentos e gastos que realicen as PeME's para adaptar a súa produción á fabricación dos seguintes materiais: téxtiles sanitarios, equipos de protección individual (máscaras, cortinas, traxes, gorros, luvas e pantallas de protección persoal), kits e consumibles de diagnose, alcoles e desinfectantes sanitarios, dispositivos de intervención ou tratamento, ventiladores e os seus compoñentes, elementos para a desinfección e outros equipamentos necesarios para a prevención e loita contra a Covid-19 ou o tratamento da enfermidade.

Os proxectos que opten aos apoios terán que ser validados polo Comité de fabricación de equipamento sanitario, posto en marcha pola Xunta para coordinar a fabricación en Galicia de equipos de protección individual (EPI) e outros produtos necesarios co obxectivo de contribuír a paliar a insuficiencia de medios de seguridade.

Máis información: liña de axudas para a fabricación de material sanitario e de protección

informa@igape.es e teléfonos 900 81 51 51 - 981 54 11 47

Subsidio de desemprego excepcional por fin de contrato temporal

2020-04-16T12:10:28Z

Persoas beneficiarias:

Persoas traballadoras que reúnan os seguintes requisitos:

Extinción de contrato de duración determinada de, polo menos, 2 meses de duración. A data de fin do contrato ha ser posterior ao 14 de marzo de 2020 (data da declaración do estado de alarma).
Carecer de rendas doutro tipo, superiores ao 75% do salario mínimo interprofesional, segundo art. 275 da Lei xeral de Seguridade Social.
Non reunir o período de cotización necesario para acceder a outra prestación ou subsidio.

Este subsidio tamén lle será recoñecido ás persoas con contratos de interinidade, formativos e de relevo.

Contía: axuda mensual do 80 % do indicador público de renda de efectos múltiples (IPREM) mensual vixente [80% x 537,84 euros (IPREM 2020): 430,27 euros/mes].

Duración: 1 mes, ampliable se así se determina por Real decreto-lei.

Este subsidio é incompatible coa percepción de calquera renda mínima, renda de inclusión, salario social ou axudas análogas concedidas pola Administración pública.

Para a tramitación, débese contactar coa Oficina de Emprego

O prazo para a solicitude será ata o 1 de maio.

Máis info premendo nesta ligazón.

Subsidio para empregadas do fogar afectadas polo cese ou redución de actividade

2020-04-02T11:40:44Z

Subsidio para empregadas do fogar afectadas polo cese ou redución de actividade.

Real decreto-lei 11/2020, do 31 de marzo, polo que se adoptan medidas urxentes complementarias no ámbito social e económico para facer fronte á COVID-19

As persoas que estean rexistradas como traballadoras do fogar antes da entrada en vigor do estado de alarma, que deixaron de prestar servizos nun ou varios domicilios, total ou parcialmente, terán dereito a esta nova prestación, para reducir o risco de transmisión debido á crise sanitaria Covid-19. Tamén as persoas traballadoras do fogar que foron sometidas a despedimento ou finalización de contrato durante a crise sanitaria.

Para solicitar o subsídio será necesario acreditar a perda total ou parcial da actividade cunha declaración responsable asinada pola persoa empregadora, a carta de despedimento, a comunicación de despedimento ou a retirada do Sistema especial de empregados domésticos do Réxime Xeral de Seguridade Social.

As empregadas do fogar terán dereito a un subsidio equivalente ao 70% da súa base reguladora no caso de que a perda de actividade sexa total. Se a empregada reduce a súa xornada laboral, percibirá a parte proporcional correspondente a esa redución de xornada. O novo subsídio é compatible con outros ingresos por conta propia ou por conta allea, sempre que non superen, en xeral, o SMI.

Non obstante, será incompatible co subsídio por incapacidade temporal ou co cobro do Permiso Retribuído Recuperable.

Este subsídio extraordinario por falta de actividade percibirase por períodos mensuais desde a data do nacemento do dereito.

A disposición transitoria terceira establece que o Servizo Público de Emprego do Estado establecerá no prazo dun mes, a partir da entrada en vigor deste Real decreto lei, o procedemento para a tramitación das solicitudes, que determinará as formas e o sistema de tramitación (presencial ou telemática) e os prazos de presentación.

IG257- Préstamos avalados para apoiar as PEME's e autónomos no contexto do actual brote da COVID-19 (2020)

2020-04-01T11:45:54Z

Para máis información e consultas, premer na ligazón ou:

- No Servizo de Atención Telemática, a través do teléfono 900 81 51 51 ou 981 54 11 47
- A través de www.igape.es ou en informa@igape.es

Finalidade / Obxectivo

Favorecer o acceso a préstamos a longo prazo para acceso a liquidez para as PEME's e autónomos cuxas actividades se atopen afectadas polo actual brote de COVID-19.

Tipos de apoio

O Igape reavalará ata un máximo do 25% do risco asumido polas SGR como primeiras avalistas.

O Igape subvencionará a fondo perdido un importe equivalente á suma dos xuros dos préstamos concedidos ao abeiro desta liña de financiamento

Beneficiarios potenciais

1. Poderán ser beneficiarias as pequenas e medianas empresas, que cumpran os seguintes requisitos:

a) Teñan o seu domicilio fiscal e desenvolvan a súa actividade económica en Galicia.

b) Cumpran os requisitos e condicións establecidos para a correspondente liña de financiamento, que se detallan no Anexo I.

2. Tamén poderán acceder á condición de beneficiario as persoas físicas, as agrupacións de persoas físicas ou xurídicas, as comunidades de bens, as sociedades civís, ou calquera outro tipo de unidade económica ou patrimonio separado que, aínda carecendo de personalidade xurídica, cumpran os requisitos.

2. Non poderán ter a condición de beneficiarias:

a) As empresas suxeitas a unha orde de recuperación de axudas, consecuencia dunha decisión Comisión Europea.
b) As empresas en crise.
c) As entidades nas que concorrese algunha das circunstancias previstas no art. 10.2 da Lei de subvencións de Galicia.

Ademais, para ser beneficiaria desta liña de financiamento, a titular deberá formalizar un préstamo a un prazo de 4 anos, que será aplicado do seguinte xeito:

1) Un mínimo do 35% do seu principal será aplicado ao pago dos seguintes conceptos de gasto: pagamentos a provedores de mercadorías, materias primas e aprovisionamentos; pagamentos a acredores por prestación de servizos, arrendamentos e/ou subministracións; pagamento de nóminas e seguros sociais; gastos financeiros operativos; pago de impostos e primas de seguros en cobertura de riscos asociados á actividade empresarial.

2) Un máximo do 65% poderá ser aplicado á cancelación de débedas bancarias e outros conceptos, sempre e cando correspondan a algunha das seguintes modalidades:

- Pago de cotas de préstamos, leasing e/ou renting vencidas ou que venzan durante os tres meses seguintes á data de formalización.
- Pago de saldos dispostos de pólizas de crédito, sempre que estas incrementen o seu dispoñible na contía da aplicación do préstamo a esta finalidade, e se manteñan abertas ata o seu vencemento.
- Débedas bancarias vencidas, cuxo vencemento se producise con posterioridade ao 1 de marzo de 2020.
- A comisión do aval así como as achegas ao capital das Sociedades de Garantía Recíproca.

Sectores incentivables

Todas as actividades excepto:

a) A fabricación de armamento, armas e municións, as instalacións ou infraestruturas militares ou policiais e o material ou infraestruturas destinados a limitar os dereitos individuais ou a liberdade das persoas (cárceres e centros de detención de todo tipo).
b) Os xogos de azar coas instalacións conexas.
c) A produción, transformación ou distribución de tabaco.
d) As actividades que implican a utilización de animais vivos con fins experimentais ou científicos.
e) As actividades cuxo impacto sobre o ambiente só pode ser atenuado ou compensado en moi escasa medida.
f) As actividades que poidan ser controvertidas por razóns de orde moral ou ética.
g) As actividades cuxo único propósito sexa a promoción inmobiliaria.

Requisitos principais do proxecto

1) Importe

O importe do préstamo non poderá superar:

a) O dobre dos custos salariais anuais do beneficiario (incluídas as cargas sociais) correspondentes ao 2019 ou ao último ano dispoñible; no caso de empresas creadas con posterioridade ao 1 de xaneiro de 2019, o importe máximo do préstamo non poderá superar, a estes efectos, a estimación dos custos salariais anuais para os primeiros dous anos de actividade, ou

b) O 25% do volume de negocios total do beneficiario en 2019.

En todo caso, o préstamo que se avalará deberá ser igual ou superior a 3.000 euros e igual ou inferior a 200.000 euros.

2) Prazo

O prazo máximo do préstamo que se avalará será de 4 anos, incluíndo 1 ano de carencia, como máximo.

3) Tipo de xuro

O tipo de xuro nominal anual que poderán cobrar as entidades de crédito para as operacións de préstamo previstas nesta liña será fixo, cun máximo do 1,5%.

4) Subvención ao tipo de xuro

O Igape poderá subvencionar a fondo perdido un importe equivalente á suma dos xuros dos préstamos concedidos ao abeiro desta modalidade.

A subvención que no seu caso sexa concedida, será determinada no momento da concesión, e pagaráselle á beneficiaria dunha soa vez, na conta bancaria que esta designe, unha vez que esta presente a xustificación e a solicitude de cobramento, conforme ao artigo 11 das Bases reguladoras. No caso de amortización anticipada do préstamo, a titular deberá reintegrarlle ao Igape a diferenza entre os xuros aboados e o importe da subvención.

5) Comisións

As comisións máximas que a entidade de crédito poderá repercutir en conceptos de apertura e estudo será do 0,60%. Para as comisións de estudo e apertura, conxuntamente, a entidade de crédito poderá estipular un mínimo de ata 30 . Para estes efectos, non se considerará comisión o cobro da tarifa de reclamación de posicións debedoras.

As SGR poderán cobrar ao cliente ata o 0,50% en concepto de comisión de aval, calculada para toda a vida da operación sobre o saldo vivo anual previsto do importe avalado, e que será cobrada por anticipado; e ata o 4,00% do importe do financiamento avalado en concepto de aportación ao capital social da SGR, que se aboará igualmente ao inicio da operación. Ambos importes poderán formar parte do préstamo avalado. O cliente poderá solicitar o reembolso da participación social unha vez remate a súa relación coa SGR.

6) Garantías

A garantía a favor das entidades de crédito será o aval da SGR adherida ao convenio, polo 100% do risco. No caso de operacións de importe superior a 150.000 euros, as operacións poderán ser coavaladas por máis dunha SGR adherida. Para estes efectos, todas as referencias destas bases ás operacións de aval e ás SGR descritas en singular, entenderanse realizadas en plural.

As contragarantías a favor da SGR consistirán no reaval do Igape en cobertura de ata o 25% do risco, e como garantía adicional poderán requirir garantías persoais, pero en ningún caso depósitos de activos líquidos ou financeiros que poidan detraer liquidez da empresa. As SGR tamén poderán contar con reavais e achegas de organismos públicos e outros dependentes da Administración.

Contía das axudas

Axuda en forma de garantía. Reaval ante SGR.

O Igape poderá subvencionar a fondo perdido un importe equivalente a suma dos xuros dos préstamos concedidos ao abeiro desta modalidade.

Prazo de presentación de solicitudes

O prazo de presentación de solicitudes de axuda comezará o día seguinte á publicación desta convocatoria no Diario Oficial de Galicia e finalizará o 30 de setembro de 2020, agás que se produza o suposto de esgotamento do crédito.

Incompatibilidades

A concesión das axudas destas bases queda supeditada ao cumprimento da normativa vixente e, en especial, á da Unión Europea. Neses termos, serán compatibles con calquera outra axuda pública ou privada pero, en ningún caso, illadamente ou en concorrencia con outras, poderán superar os límites máximos de intensidade de axuda establecidos pola Unión Europea para as axudas de minimis.

De xeito xeral, as axudas de minimis totais que se concedan a unha mesma empresa non poderán superar 200.000 euros durante calquera período de tres exercicios fiscais e, para as empresas do sector transporte de mercadorías por estrada, este límite redúcese a 100.000 euros. Para as empresas cuxa actividade estea encadeada no Regulamento de minimis específico do sector da pesca, as axudas de minimis totais que se concedan a unha mesma empresa non poderán superar 30.000 euros durante calquera período de tres exercicios fiscais. Para as empresas do sector agrícola, o límite de minimis redúcese a 20.000 euros durante calquera período de tres exercicios, co límite establecido para España.

Referencia lexislativa

Resolución do 7 de febreiro de 2020 (DOG Nº28 do 11/02/2020) - Bases reguladoras da liña de financiamento lgape-PEME's
Resolución do 31 de marzo de 2020 (DOG Nº64 do 01/04/2020) - Modificación das bases reguladoras

Información e tramitación en

* Información:

- No Servizo de Atención Telemática a través do teléfono 900 815 151 ou 981 541 147
- A través de www.igape.es ou en informa@igape.es

* Tramitación:

As solicitudes de axuda presentaranse mediante o formulario normalizado que se obterá de xeito obrigatorio na aplicación www.tramita.igape.es

Unha vez xerada a solicitude deberá presentarse obrigatoriamente por vía electrónica con certificado dixital. Será necesario que o asinante da solicitude teña a representación legal da empresa ou entidade solicitante.

A solicitude presentarase coa seguinte documentación electronicamente:

a) En caso de persoas xurídicas:

1º Escritura de constitución e dos Estatutos debidamente inscritas no rexistro competente e as súas modificacións posteriores.

2º Poder do representante que presenta a solicitude, inscrito, no seu caso, no rexistro competente.

3º No caso de entidades obrigadas a formular, aprobar e depositar contas anuais, contas anuais depositadas no Rexistro Mercantil- ou noutro rexistro, segundo proceda- correspondentes ao último exercicio pechado, xunto co informe de auditoría de ser o caso.

b) No caso de persoas físicas ou comunidades de bens: copias das declaracións do IVE: resumo anual do exercicio anterior e liquidacións periódicas do exercicio corrente. Así mesmo, as comunidades de bens deberán presentar o Anexo III de comprobación de datos de terceiras persoas interesadas.

Unha vez rexistrada a solicitude, o Igape remitiralla á entidade de crédito e á SGR, a través da extranet de entidades colaboradoras.

Observacións

Relación de entidades financeiras adheridas:

- Caixa Rural Galega
- Abanca
- Bankinter
- Banco Bilbao Vizcaya Argentaria
- Banco de Sabadell
- Banco Santander
- Caixabank

Servizo de información sobre as medidas económicas que está levando a cabo o Goberno debido á situación de alarma

2020-04-01T11:53:50Z

O Concello de Rianxo ofrece un servizo de información sobre as medidas económicas que está levando a cabo o Goberno de España para combater a situación de alarma provocada pola COVID-19.

Este servizo está destinado a traballadores ou traballadoras que poidan sufrir un ERTE, familias con hipotecas ou persoas autónomas afectadas pola situación. As persoas que o desexen poden contactar co Concello a través de:

Teléfono: 604 022 090

Correo electrónico: marcos.alejandro@concelloderianxo.gal

O horario de atención será de luns a venres de 09:00 a 13:00 horas.

Novas medidas contra o coronavirus

2020-03-26T11:11:36Z

Novas medidas de axudas a empresas ante o COVID-19.

Consellería do Medio Rural: Medidas de carácter obrigatorio en relación co Covid-19

2020-03-24T13:45:50Z

O Diario Oficial de Galicia (DOG) publica hoxe unha orde da Consellería do Medio Rural pola que adoptan medidas de carácter obrigatorio en relación co Covid-19 (ver esta ligazón)

- Prohibe a venda directa de produtos en mercados, ata o 31 de marzo como mínimo.

- En troques, fomentarase a venda de produtos agrícolas e gandeiros por medios alternativos que non impliquen presenza física, como por vía telefónica, con realización de pedidos a través da rede on line (correo electrónico) ou similares, servidos polo produtor no domicilio do consumidor, e que eviten o desprazamento de persoas pola vía pública.

- Sobre a venda de produtos vexetais para a plantación en hortas de consumidores finais, os establecementos que vendan os referidos produtos non se atoparían afectados pola suspensión de apertura decretada, de acordo coa normativa. Ademais, sen prexuízo da venda en establecemento, esta poderá realizarse tamén de xeito ambulante.

- Desprazamentos

As persoas agricultoras e viticultoras profesionais e os seus traballadores poderán efectuar os desprazamentos para a realización dos traballos necesarios de atención e mantemento dos cultivos e dos viñedos. Para os efectos desta disposición, terá a consideración de agricultor/a profesional, ben sexa a tempo completo ou parcial, quen estea de alta no Rexistro de Explotacións Agrarias de Galicia (Reaga).

No que atinxe ás persoas que teñan cultivos ou viñedos considerados de autoconsumo, é dicir, con fins non comerciais, e polo tanto non desenvolvan unha actividade profesional agraria, poderán realizar os desprazamentos mínimos e imprescindibles para o mantemento e atención dos ditos cultivos e viñas, sen que o desprazamento poida supoñer unha distancia superior a 500 metros da súa vivenda habitual. Ademais, en ningún caso poderá haber máis de dúas persoas na parcela.

Servizo de Emprego de Galicia

2020-03-26T10:44:04Z

Como consecuencia da evolución epidemiolóxica do coronavirus COVID-19 as oficinas de emprego pecharon ao público, pero continúan traballando para ti, ofrecendo atención telefónica e telemática para os trámites máis urxentes.

Para iso, Emprego Galicia, en coordinación co Servicio Público de Empleo Estatal (SEPE), adoptou as seguintes medidas:

Non será necesario renovar a demanda de emprego ata o 30 de abril de 2020.

Se estás afectado/a por un expediente temporal de suspensión de contratos ou redución de xornada (ERTE) non tes que facer ningún trámite para solicitar a túa prestación. Unha vez estea autorizado o dito ERTE, a empresa remitirá os datos necesarios para iniciar a tramitación de oficio.

Se o que necesitas é obter información ou solicitar unha prestación ou subsidio contacta antes coa Oficina de Prestacións dependente do SEPE, independentemente da situación da túa demanda de emprego. Para facelo, tes que empregar o sistema de cita previa virtual, ao que podes acceder no seguinte enlace. Fai un uso responsable deste sistema e, antes de solicitar a túa cita, consulta no portal do SEPE as medidas implementadas nesta situación extraordinaria:

https://sede.sepe.gob.es/contenidosSede/generico.do…

Se tes que realizar calquera outro trámite urxente na túa demanda de emprego ou solicitar un certificado ou un informe, poderás facelo:

- a través da Oficina virtual: reactivación da demanda despois dunha baixa por colocación non superior a 365 días.
- poñéndote en contacto coa túa oficina de emprego telefonicamente ou a través dun correo electrónico.

Non se dará de baixa ás persoas estranxeiras que teñan pendente a renovación dunha autorización administrativa ou estean pendentes de presentar algunha documentación xustificativa.

Non se esixirá a acreditación da busca activa de emprego (BAE) na solicitude do subsidio extraordinario ou renda activa de inserción.

Quedan suspendidas as citas presenciais de orientación laboral.

Quedan aprazadas, mentres dure a suspensión das actividades educativas, as accións de formación profesional para o emprego xestionadas ou financiadas pola Xunta de Galicia, os obradoiros de emprego e os programas integrados de emprego.

Desde Emprego Galicia iremos actualizando toda esta información a medida que se desenvolva esta situación de emerxencia.

Máis información nesta ligazón.

Para consultas xerais, chama ao teléfono de información 012 ou á túa oficina de emprego.

Tramitación da prestación por cese de actividade motivado polo COVID-19

2020-03-26T10:46:32Z

Se es unha persoa traballadora por conta propia ou autónomo/a e queres tramitar a prestación por cese temporal de actividade:

a) Se tes as continxencias comúns e as profesionais cunha mutua, deberás de tramitalo coa propia mutua.

b) Se tes as continxenias profesionais cunha entidade xestora da Seguridade Social, deberás de tramitalo directamente co SEPE.

Máis información nesta ligazón.

Prestación da Seguridade Social por cese de actividade por COVID-19

2020-03-27T16:09:27Z

Con motivo do COVID-19 estableceuse unha prestación extraordinaria por cese de actividade para as persoas afectadas pola declaración do estado de alarma, dirixida a traballadores/as por conta propia ou autónomos/as:

- A duración da prestación será dun mes (a partir de 14 de marzo) ou ata o último día do mes en que finalice o estado de alarma, de prolongarse este durante máis dun mes.

- Dirixida a traballadores/as por conta propia ou autónomos/as, cuxas actividades queden suspendidas ou cando a súa facturación no mes anterior se vexa reducida polo menos nun 75%, con relación ao promedio de facturación do semestre anterior.

1.Requisitos:

a) Estar afiliados/as e en alta, o día da declaración do estado de alarma.

b) No suposto de que a actividade non se vexa directamente suspendida a causa do COVID-19, acreditar a redución da facturación nun 75% respecto á efectuada no semestre anterior.

c) Estar ao corrente de pagos das cotas da Seguridade Social.

2. A contía da prestación será do 70% da base reguladora de cada caso.

3. A prestación terá unha duración dun mes, a partir do 14 de marzo, ampliable en caso de continuar o estado de alarma.

4. A percepción é incompatible con calquera outra prestación da Seguridade Social.

5. As persoas socias traballadoras de cooperativas, que optaran polo encadramento no réxime de persoas traballadoras por conta propia, terán dereito á prestación.

Máis información premendo nesta ligazón.

Obradoiro dual de emprego "CLÍNICA VELLA"

2019-10-03T14:12:50Z

O Concello de Rianxo vai poñer en marcha o Obradoiro dual de emprego "CLÍNICA VELLA" para a formación de 15 alumnos/as - traballadores/as na especialidade de "INSTALACIÓN DE PLACA DE XESO LAMINADO E FALSOS TEITOS", segundo a subvención concedida pola Consellería de Economía, Emprego e Industria, ao abeiro da Orde do 17 de abril de 2019 pola que se establecen as bases reguladoras das axudas e subvencións para os obradoiros duais de emprego da Comunidade Autónoma de Galicia e se procede á súa convocatoria para o ano 2019.

A especialidade formativa que se vai impartir correspóndese cun certificado de profesionalidade de nivel 2 polo que as persoas aspirantes deberán cumprir algún dos seguintes requisitos formativos:

Ter o título da ESO ou equivalente ou titulacións correspondentes a ciclos de grao medio ou superior
Ter superadas as probas das competencias clave de nivel 2, correspondentes aos certificados de profesionalidade
Dispoñer dun certificado de profesionalidade de nivel 2 o de nivel 3
Dispoñer dun certificado de profesionalidade de nivel 1 sempre que sexa da mesma familia e área profesional que a do certificado de profesionalidade que se vai impartir
Ter superada a proba de acceso a ciclos de grao medio, grao superior ou a proba de acceso á universidade
Ter superados todos os módulos obrigatorios dun PCPI ou Formación Profesional Básica
Ter superado o curso de formación específico para o acceso a ciclos de grao medio

As persoas interesadas en participar como alumnado deberán estar desempregadas e inscritas como demandantes de emprego no Servizo Público de Emprego e indicar que están interesadas en participar nos programas de obradoiros de emprego.

Ademais, deberán acudir á Oficina de Emprego de Boiro para comprobar a súa situación e documentación xustificativa e axeitada para poder participar nesta acción formativa.

O prazo para acudir á Oficina de Emprego de Boiro remata o próximo xoves día 10 de outubro.

PROXECTO EIXO: Acción formativa correspondente ao certificado de profesionalidade de comercio e loxística

2019-09-04T11:13:11Z

A Deputación Provincial da Coruña vai realizar un Curso de comercio e loxística dirixido a persoas mozas menores de 30 anos, inscritas na Oficina de Emprego correspondente e rexistradas no ficheiro do Sistema Nacional de Garantía Xuvenil.

O prazo de preinscripción é ata o día 13 de setembro de 2019 ás 14:00 horas, no Servizo de Persoal e Emprego Servizo de Orientación Laboral do Concello de Rianxo.

A finalidade deste curso é formar para o traballo, proporcionando unha cualificación de acceso a un posto profesional de calidade, ao tempo que se favorece o desenvolvemento dunha profesión nun ámbito con gran demanda a nivel provincial, sendo ademais unha das ocupacións con valor en alza na Estratexia Española de Activación para o Emprego, e as particulares características da nosa provincia con parques empresariais e novas iniciativas empresariais localizadas ao longo da xeografía, que apoiados na distribución e transporte das súas producións a nivel nacional e internacional se constitúen como recurso importante para a inserción laboral pero que esixen a certificación de aptitude profesional con validez en todo o territorio europeo, tanto para o manexo de medios de transporte (condución de vehículos) coma de medios de organización de mercadorías en almacéns (carretillas elevadoras e grúas para estiba/desestiba).

PERSOAS MOZAS BENEFICIARIAS DA FORMACIÓN:

Dirixido a persoas mozas menores de 30 anos e desempregadas da provincia da Coruña, incluídas as persoas con discapacidade, non ocupadas e non integradas nos sistemas de educación ou formación, inscritas na Oficina de Emprego correspondente e rexistradas no ficheiro do Sistema Nacional de Garantía Xove, e que ademais cumpren os seguintes requisitos:

- Ter cumpridos 18 anos de idade

- Estar empadroado/a nalgún dos concellos de menos de 50.000 habitantes da provincia.

- Inscrición en Garantía Xuvenil (na oficina de emprego).

- Ser titular dun permiso de condución en vigor da clase B.

- Non se precisa ningún requisito de formación previa, xa que se trata dun certificado profesional de nivel 1.

* Está prevista a concesión dunha axuda/bolsa económica ás persoas participantes na formación específica/complementaria/transversal prevista no proxecto EIXO a fin de incentivar a súa permanencia nas mesmas e obter os obxectivos previstos de mellora da cualificación e empregabilidade e de inserción no mercado laboral . A súa contía máxima ascenderá á cantidade de 2,6€ brutos hora lectiva de día asistido.

* No caso de haber máis de 1 persoa candidata, o Concello fará entrevistas de selección e establecerá unha orde de prioridade segundo a dispoñibilidade e idoneidade das candidaturas presentadas.

* A formación teórico- práctica realizarase nas instalacións que oferta a empresa adxudicataria en A Barcala-Cambre e no Polígono Industrial de Ledoño (Culleredo).