Desenvolvemento local

Horarios de peche dos establecementos e de finalización das actividades recreativas - Festas do Nadal 2025

2025-12-19T13:01:13Z

O Concello de Rianxo, mediante a Resolución da Alcaldía núm. 1.508/2025 do 19/12/2025, resolveu ampliar en dúas horas o horario de peche ordinario dos establecementos do termo municipal do Concello de Rianxo abertos ao público, así como a finalización dos espectáculos públicos e actividades recreativas durante a celebración das Festas do Nadal, os días 20, 24, 26, 27, 31 de decembro de 2025 e 2, 3 e 5 de xaneiro de 2026.

Resolución da Alcaldía

Os BONOS RIANXO xa están dispoñibles para descargar

2022-05-24T11:26:17Z

Xa podes solicitar os teus BONOS para facer compras nos establecementos adheridos ao programa BONOS RIANXO, ata o 30 de xuño.

Esta iniciativa do Concello de Rianxo en colaboración coa Asociación Rianxeira de Empresarios (ARE) ten como obxectivo incentivar o consumo nos establecementos minoristas para a venda de produtos e oferta de servizos reforzando a competitividade do sector. Conta con 15.000 euros para a emisión de 500 paquetes de bonos, os cales poderán empregarse ata o 30 de xuño de 2022, rematada esta data os bonos non trocados caducarán.

As características dos Bonos RIANXO son as seguintes:

1. Cada lote de bonos terá un valor de 30€ que irán fraccionados en 2 bonos de 10€ e 2 de 5€. Os bonos de 10€ poderán descontarse en compras iguais ou superiores a 30€ e os bonos de 5€ en compras iguais ou superiores a 15€ nos establecementos adheridos a esta convocatoria.

2. Só poderán solicitar bonos as persoas maiores de idade cun límite máximo dun lote de bonos por persoa.

3. O importe de cada lote de bonos poderá gastarse nunha única transacción ou de forma fraccionada segundo as condicións indicadas no punto 1.

4. No caso de que se produza unha devolución do produto, o establecemento deberá emitir un vale polo importe íntegro da compra, non sendo posible a devolución en efectivo.

5. A persoa titular do bono poderá trocalo no momento da compra que reúna os requisitos para iso mediante a exhibición do seu DNI. A factura da compra debe reflectir o desconto.

Solicita o teu bono

Lanzamento da campaña BONOS RIANXO para incentivar o consumo no comercio local

2022-04-21T12:45:37Z

Ponse en marcha a primeira fase da campaña BONOS RIANXO para a adhesión dos establecementos colaboradores, ata o 12 de maio.

Esta iniciativa do Concello de Rianxo en colaboración coa Asociación Rianxeira de Empresarios (ARE) ten como obxectivo incentivar o consumo nos establecementos retallistas para a venda de produtos e a oferta de servizos reforzando a competitividade do sector. Conta con 15.000 euros para a emisión de 500 paquetes de bonos, os cales poderán empregarse ata o 30 de xuño de 2022, rematada esta data os bonos non trocados caducarán.

https://are.gal/Bonos-Rianxo/

Fala cos Reis Magos

2021-12-17T13:37:29Z

As túas compras no Comercio Local teñen premio. Cos teus tickets podes solicitar que os Reis magos te chamen por videoconferencia!

Máis información en https://nadalrianxo.com/

Xustificación final da subvención PEL REACTIVA 2020 - Documentación pendente

2021-04-29T08:47:40Z

Co fin de axilizar o pago das axudas PEL REACTIVA, requírese ás empresas beneficiarias da subvención que presenten a documentación necesaria, e que se indica de seguido, para comprobar dous requisitos establecidos na Base 14ª da convocatoria e que marca as obrigas dos/as beneficiarios/as das axudas:

Documento acreditativo que xustifique a obriga dos/das beneficiarios/as de permanecer en alta no Réxime Especial da Seguridade Social de Traballadores por Conta Propia/ Autónomos ou no que, no seu caso, corresponda da Seguridade Social ou en Mutualidades profesionais ou no caso das microempresas, a manter a mesma forma xurídica polo menos 3 meses dende a finalización do período subvencionable (desde o 01 de xaneiro de 2021 ata o 31 de marzo de 2021, ambas as datas incluídas)
Declaración responsable sobre a recepción doutras axudas-PEL REACTIVA (achégase modelo)

Declaración responsable sobre a recepción doutras axudas PEL REACTIVA (PDF)

Proxecto EIXO_FSE_POEJ

2021-02-26T13:54:20Z

A Deputación da Coruña, a través do seu Plan de emprego local, propón un itinerario formativo relacionado coa seguridade e o medio ambiente, encamiñado a obter o certificado de profesionalidade en Limpeza de Espazos Abertos e Instalacións Industriais (nivel 1). Ademais da formación específica neste campo, o itinerario consta de formación complementaria noutros aspectos transversais como son a prevención de riscos laborais, idiomas (inglés), novas tecnoloxías, igualdade de oportunidades e prácticas en empresa.

Accións transversais e complementarias	Duración(horas)
Titorías	7
Igualdade de oportunidades	20
Lingua estranxeira (Inglés) A1/A2	50
Novas tecnoloxías: redes e ferramentas	20
Alfabetización informática: informática e Internet	25
Prevención de riscos laborais	60

Ademais, haberá accións de intermediación e orientación para o desenvolvemento competencial de aspectos persoais e profesionais para que as persoas participantes se sitúen favorablemente no ámbito laboral.

Axuda económica ás persoas participantes no itinerario
Está prevista a concesión dunha axuda/bolsa económica ás persoas participantes neste itinerario previsto no proxecto EIXO, co fin de incentivar a súa permanencia neste e obter os obxectivos profesionais e laborais previstos de mellora da cualificación e empregabilidade e de inserción no mercado laboral . A súa contía máxima ascenderá á cantidade de 2,6 € brutos hora de xornada laboral cumprida. Aplicaranse as retencións que correspondan segundo a situación persoal de cada un dos mozos e mozas participantes.

Persoas mozas beneficiarias da formación
Este itinerario e as accións formativas que contempla, van dirixidas a persoas mozas que reúnan os requisitos especificados nas axudas do Fondo Social Europeo, previstas no Programa Operativo de Emprego Xove (axudas AP_POEJ), todas elas menores de 30 anos e desempregadas da provincia da Coruña, incluídas as persoas con discapacidade, non ocupadas e no integradas nos sistemas de educación ou formación, inscritas na Oficina de Emprego correspondente e rexistradas no ficheiro do Sistema Nacional de Garantía Xove, e que ademais cumpran os seguintes requisitos:
- Ter cumpridos 16 anos de idade.
- Estar empadroado/a en algún dos concellos de menos de 50.000 habitantes da provincia (neste caso, Rianxo).
- Non se esixen requisitos de formación previa.

Para a selección das persoas participantes realizaranse entrevistas persoais e teranse en conta, para establecer a orde das candidatas, os coñecementos ou a formación previa relacionada con esta área e/ou sector de actividade, a experiencia profesional ou en voluntariado, a antigüidade como demandante de emprego e a situación persoal.

Valoraranse criterios específicos como dispoñibilidade para participar e trasladarse a outra localidade, implicación activa nas accións que se desenvolvan arredor deste itinerario, motivación persoal, expectativas de desenvolvemento profesional desta ocupación, cualidades, habilidades, actitudes, motivación laboral, carácter emprendedor, etc., que se establecen co fin de poder perfilar a intensidade de traballo do itinerario máis adecuado a cada mozo e moza para acadar a súa inserción efectiva no mercado laboral.

PROCEDEMENTO:
1. Inscrición e presentación de solicitudes: todas as persoas mozas interesadas en participar teñen que entregar a solicitude e a documentación esixida no lugar e prazo establecido polo concello no que estean empadroadas.
2. Cumprimento de criterios de carácter xeral: o persoal técnico dos concellos, é o responsable de estimar ou desestimar as inscricións recibidas en función de si a documentación achegada está completa e é correcta. De entre as solicitudes completas e admitidas, realizará unha valoración conforme á documentación achegada e establecerán a ordenación das solicitudes segundo os criterios propios de cada concello.
3. Entrevista persoal: para o caso de que existan máis persoas candidatas que unha en cada concello, este realizará unha entrevista ás mozas e mozos que presentaran a solicitude e a documentación completa, na que se valorarán os aspectos xa comentados no apartado anterior e a dispoñibilidade real de participación e asistencia ao itinerario completo deseñado (formación transversal e complementaria), a non existencia de impedimentos a esta participación (eventos familiares, tratamentos ou intervencións cirúrxicas pendentes, etc.) a adecuación da acción práctica solicitada coa traxectoria formativa da persoa candidata e a existencia dun proxecto de diversificación profesional coherente en cada caso. Como resultado deste proceso de selección, as persoas candidatas serán ordenadas por prioridade, e serán admitidas no itinerario por orde de envío da solicitude por correo electrónico con base ao prazo que se asigne desde o equipo técnico do proxecto.
4. Listaxe definitiva: A listaxe definitiva de persoas admitidas e suplentes será elaborada polo equipo técnico do proxecto con base ao mantemento do equilibrio territorial, seleccionando primeiro á persoa con maior puntuación de cada un dos concellos que enviaron candidaturas segundo a orde de chegada, para despois seleccionar en segunda rolda, no caso de que sexa necesario, á persoa seguinte en puntuación de cada un dos concellos ata completar a listaxe de participantes e suplentes. Estes últimos só poderían incorporarse cando algunha das persoas admitidas cause baixa e non se supere a porcentaxe de días sen asistencia que non permita a obtención do diploma.

Ámbito territorial e sede das accións do itinerario
O ámbito territorial de orixe das persoas participantes é coincidente co ámbito territorial do proxecto, no que se circunscriben todos os concellos da provincia da Coruña, excepto aqueles que teñen máis de 50.000 habitantes, A Coruña, Ferrol e Santiago.
A realización das prácticas localizarase nos centros de traballo onde se sitúen as empresas e/ou entidades públicas da contorna que se adhiran a este itinerario e formalicen un acordo de prácticas.

Sedes propostas: Cerceda e Muros.

Prazo e presentación de solicitudes

Ata o 1 de marzo ás 15:00 horas, no Servizo de Orientación Laboral do Concello de Rianxo.

Documentación que se debe presentar

1. Ficha de solicitude completamente cumprimentada e asinada.
2. Ficha de historial cumprimentado e asinado da persoa candidata e CV formativo e profesional.
3. DNI por ambas as dúas caras.
4. Tarxeta ou documento que acredite o número de afiliación á Seguridade Social.
5. Certificado/volante actualizado de empadroamento.
6. Tarxeta de demanda de emprego debidamente actualizada (non se considerarán as tarxetas de demanda de mellora de emprego).
7. Documento académico que acredite o requisito de acceso.
8. Documento que acredite a inscrición no rexistro do Sistema Nacional de Garantía Xuvenil (Acceso a zona persoal na plataforma de Garantía Xuvenil e descarga no apartado de “notificacións” do documento, en formato “pdf”, que acredita que a persoa solicitante está rexistrada e é beneficiaria do sistema).

Descarga de documentos para a inscrición (Premer aquí)

Programa de salvamento e socorrismo acuático

2021-01-15T11:57:29Z

FORMULARIO DE INSCRIPCIÓN

PROGRAMA FORMATIVO

Está previsto no marco do Plan de Emprego Local, a impartición dos seguintes certificados de profesionalidade no Programa de Salvamento e Socorrismo Acuático:

AFDP0209 SOCORRISMO EN ESPAZOS ACUÁTICOS NATURAIS_ 420 horas (340 formación teórica e 80 formación práctica)

AFDP0109 SOCORRISMO EN INSTALACIÓNS ACUÁTICAS_ 210 horas (130 formación teórica e 80 formación práctica)

A formación teórico- práctica realizarase no Centro de Formación de Cruz Vermella na cidade de A Coruña e as prácticas profesionais non laborais, en praias de concellos da provincia. Primeiro desenvolverase a formación en espazos naturais con data de inicio prevista para mediados de febreiro e logo da tempada de praias, previsiblemente a finais de setembro, desenvolverase a formación en instalacións acuáticas.

As clases impartiranse de luns a venres, de xeito presencial, unha edición en horario de mañán (09:00 a 14:00) e outra edición de tarde (16:00 a 21:00), contemplando as dúas a mesma programación dos dous certificados de profesionalidade.

A preinscripción farase entregando a documentación necesaria no Concello de Rianxo (Servizo de Orientación Laboral). Esta documentación é a seguinte:

Formulario de inscripción debidamente cuberto (dispoñible na ligazón de máis abaixo)
Informe de vida laboral /Certificado non alta no Sistema da Seguridade Social
Acreditación do nivel académico (copia titulación)
Certificado ou Volante de empadroamento
Tarxeta de demandante de emprego (copia)
Certificado ou Informe de saúde (especificado máis abaixo)
DNI ou NIE (copia)

Inicio da formación:

Socorrismo en espazos acuáticos naturais: febreiro 2021

Socorrismo e instalacións acuáticas: setembro 2021

A inscrición realizarase nunha única solicitude para participar nas dúas accións formativas, polo que se obterá así a dobre titulación. Comezarase en primeiro lugar coa formación en socorrismo en espazos acuáticos naturais, de xeito que as prácticas sexan coincidentes coa tempada de praias do ano en curso, coa posterior incorporación ao remate destas, á formación en instalacións acuáticas.

Requisitos das persoas candidatas:

Estar inscritas na Oficina de Emprego que lle corresponda e coa tarxeta de demandante de emprego vixente á data do prazo de inscrición.
Ter cumpridos os 18 anos de idade no momento da inscrición.
Estar empadroado/a en algún dos concellos da provincia da Coruña, preferentemente con poboación inferior a 50.000 habitantes

Requisitos específicos:

As persoas candidatas deberán cumprir os requisitos específicos seguintes:

Nivel académico ou de coñecementos xerais: estar en posesión dos títulos ou certificados precisos para cursar a formación correspondente ao certificado de profesionalidade de nivel 2.
Condicións físicas: carencia de afeccións crónicas e enfermidades infecto-contaxiosas .
Integridade física, resistencia, forza, destreza, coordinación visomotriz, axilidade, rapidez de reflexos.

Proba de natación

As persoas candidatas, no caso de superar as solicitudes o número de prazas de cada edición, terán que superar probas de natación.

Para efectualas, é necesario levar o día que se lles cite para as probas: traxe de baño deportivo, gorro de piscina, gafas de natación, chancletas e toalla.

Nadar 200 metros estilo libre nun tempo máximo de 4´15” (catro minutos 15 segundos) e realizar, sen impulso, 20 metros en apnea.

Documentación e xestións

Para ser persoa candidata e participar nestas accións formativas cubrirase o formulario de candidatura, asinarase a declaración de cumprimento de requisitos e soamente se achegará coa solicitude, o seguinte documento escaneado:

Certificado ou Informe de saúde recente, emitido, asinado e selado por facultativo con data non anterior ao 11 de xaneiro de 2021, sobre o cumprimento das capacidades físico-psíquicas para o desenvolvemento da actividade profesional de salvamento e socorrismo acuático

Só se admitirán 6 inscricións por concello de persoas empadroadas neste, serán candidatas para a realización das probas de selección aquelas persoas das que se achegue o formulario completo e asinado e o documento escaneado que se solicita no prazo previsto.

Procedemento de selección

Segundo os resultados da convocatoria de persoas candidatas, indicaranse, unha vez remate o prazo de inscrición, a data, a instalación e a localidade onde se realicen as probas físicas que corresponda.

As 20 persoas candidatas segundo a orde de puntuación obtida de maior a menor e/ou que acaden os mellores resultados nas probas, terán que superar unha entrevista persoal na que serán, consideradas APTAS/NON APTAS.

Estas persoas terán que acudir o día e hora da cita á entrevista con toda a documentación que acredite o cumprimento dos requisitos para ser participante nas accións formativas:

Informe de vida laboral/Certificado non alta no Sistema da Seguridade Social
Acreditación do nivel académico (copia titulación)
Certificado ou Volante de empadroamento
Tarxeta de demandante de emprego (copia)
Certificado ou Informe de saúde
DNI ou NIE (copia)

No caso de resultado NON APTA na entrevista, chamarase á seguinte persoa da listaxe e segundo a orde de puntuación obtida de maior a menor, ata completar o número máximo de alumno/a por acción formativa. O resto de persoas quedarán na listaxe segundo a mesma orde; como suplentes para o caso das baixas que causen nos 5 primeiros días desde o inicio.

En caso de empate nos resultados das probas, terán preferencia de entre as persoas empatadas, aquelas que estean empadroadas en concellos costeiros da provincia da Coruña de menos de 20.000 habitantes, e aplicarase no caso de coincidencia, a preferencia de candidata sobre candidato.

A Deputación da Coruña ten prevista a concesión dunha compensación económica como medida de fomento da formación e aptitude para o emprego destinada ás persoas participantes na formación AFPDP0209_Socorrismo en Espazos Acuáticos Naturais e AFDP0109_ Socorrismo en Instalacións Acuáticas, sempre e cando cumpran cos requisitos e condicións formuladas no procedemento de retribución de bolsas.

A contía da bolsa establécese en función do seguinte criterio:

Importe fixo por días de duración do curso (fase teórica e fase práctica)

Importe diario bruto por día asistido (xornada de 5 horas)

Duración estimada total acción formativa

Bolsa total a aboar

Retención segundo o detallado no Modelo 145. Comunicación de datos ao pagador

Importe diario líquido

8,00€ brutos/diarios

1,60€ brutos/hora de asistencia

125 días

1.000,00€

Proporcional á asistencia completa ou por horas, xunto a diferenza entre o importe bruto que corresponda e a porcentaxe de IRPF que se ha aplicar

Festa da Xouba 2020

2020-07-23T10:02:03Z

A 28º edición da festa da Xouba terá lugar en Rianxo o 25 e 26 de xullo de 2020, como de forma tradicional se viña celebrando.

Desta volta, e debido ás circunstancias provocadas pola pandemia da COVID-19, é necesario evitar a presenza de multitudes en espazos limitados, pero ao mesmo tempo non queremos deixar de exaltar este noso prezado produto e que en Rianxo, esta fin de semana, se poda degustar este ben da nosa ría.

A proposta vira en torno á degustación da xouba nos propios locais hostaleiros de todo o municipio. O Concello de Rianxo proporcionará lotes de xouba aos establecementos colaboradores para que ofrezan tapas baseadas neste produto durante a fin de semana, coas normas de seguridade e hixiene que están actualmente en vigor.

Para facilitar que nos podamos mover camiñando entre os distintos establecementos hostaleiros e tamén para posibilitar o aumento do espazo para terrazas, na medida das posibilidades e afectando o menos posible a mobilidade, esta fin de semana ampliaremos as zonas peonís.

Buscamos que Rianxo siga sendo destino seguro e que as persoas que se acheguen adoptando as medidas de seguridade necesarias, podan gozar deste manxar nas distintas preparacións que se ofrezan.

Reunións por videoconferencia, por sectores de actividade, con persoas autónomas ou persoas que rexentan un pequeno negocio no Concello de Rianxo

2020-06-11T08:12:42Z

Forma de conectarse:

A través da plataforma Jitsi, premendo na seguinte ligazón:

https://jitsi.concelloderianxo.gal/negociolocal

O acceso á plataforma pódese facer mediante:

Dispositivo móbil (teléfono ou tableta)
Ordenador persoal (portátil ou sobremesa)

En todo caso, os dispositivos deben dispor de cámara, altofalantes e micrófono.

Acceso desde un dispositivo móbil:

Instalar a app Jitsi Meet desde Play Store (para Android) ou App Store (para iPhone).
Premer na ligazón exposta máis arriba. Se desta forma non se conecta, escribir concelloderianxo.gal/negociolocal e premer en CREAR/UNIRSE.

Acceso desde un ordenador:

Premer na ligazón. Abonda con dispor, ademais da cámara, micrófono e altofalantes, dun navegador web moderno e actualizado. Recoméndase o uso dos seguintes navegadores:

Mozilla Firefox
Google Chrome

Data e hora:

Desde o Concello contactarase coas persoas que rexenten un negocio para acordar data e hora.

Máis información:

marcos.alejandro@concelloderianxo.gal

667 115 020

Reunións por videoconferencia con persoas autónomas ou persoas que rexentan un pequeno negocio no Concello de Rianxo

2020-05-21T12:13:51Z

Forma de conectarse:

A través de JITSI, que é unha plataforma para falar por videoconderencia, premendo na seguinte ligazón:

https://jitsi.concelloderianxo.gal/comerciolocal

O acceso á plataforma pódese facer mediante:

Dispositivo móbil (teléfono ou tableta)
Ordenador persoal (portátil ou sobremesa)

En todo caso, os dispositivos deben dispor de cámara, altofalantes e micrófono.

Acceso desde un dispositivo móbil:

Instalar a app Jitsi Meet desde Play Store (para Android) ou App Store (para iPhone).
Premer na ligazón exposta máis arriba. Se desta forma non se conecta, escribir concelloderianxo.gal/comerciolocal e premer en CREAR/UNIRSE.

Acceso desde un ordenador:

Premer na ligazón. Abonda con dispor, ademais da cámara, micrófono e altofalantes, dun navegador web moderno e actualizado. Recoméndase o uso dos seguintes navegadores:

Mozilla Firefox
Google Chrome

Data e hora:

Martes 26 de maio. Conexións ás 9:00 e ás 14:00 h.

Máis información:

marcos.alejandro@concelloderianxo.gal

667 115 020

Rianxo, xuntos por un novo comezo.

2020-05-15T10:26:44Z

Spot de promoción do comercio local.

Agora máis ca nunca, merca no comercio local

2020-05-12T04:42:55Z

Mercar no comercio de proximidade é a mellor forma de previr a crise económica e xerar riqueza que repercute no concello, na veciñanza, no tecido comercial e tamén no social.

O comercio de proximidade, o das nosas veciñas e o dos nosos veciños, estivo aí para nós durante a crise sanitaria. A mellor forma de agradecérllelo é mercar nas súas tendas e contratar os seus servizos.

Inviste en Rianxo. Merca no comercio local.

Rianxo con boa letra. Documental sobre a industria e a actividade económica no Concello de Rianxo

2020-05-04T08:41:13Z

O sábado 2 de maio estreouse por streaming o documental Rianxo con boa letra, da produtora Xurdir, no que interviron Adolfo Muíños, alcalde de Rianxo e Ignacio Seijo, director de Xurdir. O acto foi presentado por Eva Iglesias.

https://www.youtube.com/channel/UCGGEa0hV7mTHBfNm--HfXGA

Rianxo con boa letra. Estrea do documental sobre a industria e a actividade económica no Concello de Rianxo

2020-05-01T14:30:10Z

O sábado 2 de maio estrearase por streaming o documental Rianxo con boa letra, da produtora Xurdir, no que intervirán Adolfo Muíños, alcalde de Rianxo e Ignacio Seijo, director de Xurdir. O acto será presentado por Eva Iglesias.

A emisión en directo será ás 20.30 h pola canle de Youtube da produtora Xurdir: https://www.youtube.com/channel/UCGGEa0hV7mTHBfNm--HfXGA

Merca en Rianxo, gañamos tod@s

2019-12-20T09:07:03Z

Campaña de Nadal de consumo no comercio local. Este Nadal, merca no teu concello, para beneficio de tod@s,.

Primeiro de maio, Día da Xente do Mar. Homenaxe ás persoas de Rianxo falecidas no mar

2019-06-16T10:43:08Z

O vindeiro mércores, Primeiro de maio, celébrase a homenaxe ás persoas falecidas no mar. Todos os anos se homenaxea a dúas das persoas falecidas, e fan a ofrenda familiares próximos en recordo dos seus.

O acto de homenaxe consistirá na ofrenda dunha coroa de loureiro no monumento aos Afogados no Parque Galicia, para posteriormente celebrar unha misa, e rematarase co lanzamento-ofrenda ao mar dunha coroa.

Os actos comezarán ás 11:00 horas no Parque Galicia, e desprazaranse á Capela de San Bartolomeu para celebrar a Misa, que será ás 11:30. Ao rematar esta, embarcarémonos para realizar a ofrenda do Mar, nas Lobeira. A ASC Fogo Fatuo acompañara a comitiva con pezas tradicionais galegas.

Xa como actos máis lúdicos, teremos un vermú musical de 13:30 a 14:30 horas polas rúas da vila. Pola tarde, ás 18:30, haberá baile e música tradicionais a cargo da ASC Fogo Fatuo e un concerto do grupo Onte e Hoxe na Praza de Rafael Dieste. En caso de chuvia, estes actos serán no Auditorio de Rianxo.

“Así seguía rezando, rezando sempre, por todos cantos morreron naquel camiño do mar. A vella mandadeira gardaba na memoria os nomes dos afogados e as datas das traxedias.”
A siña Sinforosa, de Cousas A.D.R. Castelao.

VII Programa de emprendemento agroalimentario

2018-10-31T08:25:18Z

A Fundación Juana de Vega pon en marcha a convocatoria do VII Programa de emprendemento agroalimentario.

Qué é o programa de emprendemento agroalimentario?

É un programa de apoio ao deseño, desenvolvemento e implantación de iniciativas e proxectos empresariais innovadores nos sectores agroalimentario, forestal, pesqueiro e marisqueiro, así como proxectos de base tecnolóxica e servizos relacionados cos anteriores, que contribúan ao desenvolvemento do medio rural de Galicia.

Cal é o seu obxectivo?

Axudar aos emprendedores a desenvolver as súas ideas empresariais, convertelas en proxectos de negocio e materializalas en empresas reais, innovadoras e competitivas.

Quen pode participar?

Emprendedores con proxectos de:

Empresas de nova creación ou en fase de lanzamento.
Sucesión e recuperación de empresas e explotacións familiares.
Posta en valor de activos rurais improdutivos.
Empresas que desexen poñer no mercado novos productos ou servizos innovadores.

Como se desenvolve?

Obradoiro de ideas: Obradoiro de ideas empresariais de caracter selectivo de 10 horas de duración (32 prazas - xaneiro 2019)
Desenvolvemento do proxecto: As mellores ideas empresariais recibirán asesoramento para desenvolver o seu PLAN DE EMPRESA (10 prazas - de febreiro a xullo 2019)
Posta en marcha do proxecto: Axuda ao lanzamento da empresa ao mercado: IMPLANTACIÓN (10 prazas - de setembro a novembro 2019)

Para máis información consulta as bases do programa en:

www.juanadevega.org

Axudas para proxectos cooperativos no rural

2018-06-14T13:17:08Z

A Consellería de Medio Rural vén de convocar unha liña de axudas para proxectos cooperativos no rural que inclúen: a posta en marcha de “laboratorios cooperativos” no rural (iniciativas de formación, identificación de oportunidades e asesoramento ás persoas emprendedoras), e o apoio a proxectos empresariais colectivos.

A creación de laboratorios cooperativos pode ser solicitada por Concellos, mancomunidades, consorcios locais, asociacións de entidades de economía social ou asociacións e fundacións que teñan entre os seus fins a promoción do cooperativismo e do emprendemento.

As axudas para a súa creación poden solicitarse ata o 9 de xullo.

A segunda liña das axudas vai destinada á creación de cooperativas ou sociedades laborais de nova creación, constituídas a raíz da participación nun laboratorio cooperativo e que teñan o seu domicilio social nun concello rural de Galicia. As persoas que creen a cooperativa ou sociedade deberán ser desempregadas e demandantes de emprego.

As solicitudes para esta liña de axudas poderán presentarse ata o 1 de outubro do 2018.

Pódese consultar nesta ligazón o DOG núm. 108 coa convocatoria.

Fin do curso de venda por internet

2018-06-13T11:17:29Z

A concelleira de Promoción Económica e Desenvolvemento Local, Adelina Cés Quintáns, fixo onte a entrega de diplomas ao alumnado participante no curso de venda electrónica EMPEZAR A VENDER EN INTERNET, desenvolvido dentro da campaña “En Rianxo, ao noso xeito”, organizado por esa concellaría e mais o Servizo de Normalización Lingüística.

A formación foi impartida por Agustín Pérez, especialista e docente en mercadotecnia dixital, comercio electrónico, empresa e turismo, e incluíu unha introdución á venda en liña, con especial referencia ao pequeno comercio; como poñer en funcionamento unha web propia de vendas, ferramentas técnicas e recursos para fidelizar a clientela, xunto co deseño e elaboración da propia web.

O obxectivo desta actividade é dinamizar o sector económico rianxeiro e facilitar melloras para os negocios locais, co fin de ofrecer un mellor servizo e ampliar o ámbito de influencia das empresas rianxeiras, tendo como referente a lingua galega como elemento indispensable do traballo diario e na atención á clientela.

A campaña de dinamización do comercio e da hostalaría rianxeiras “En Rianxo, ao noso xeito” continúa a súa implantación e segue aberta para que se poidan sumar novos establecementos. En breve comezará a deseñarse unha páxina web para promover todos os establecementos e negocios rianxeiros co obxectivo de dalos a coñecer e situalos no mapa, e facilitar, deste xeito, o acceso da veciñanza e das persoas visitantes.

Para formalizar a súa adhesión deberán poñerse en contacto co Servizo de Normalización Lingüística (normalizacion@concelloderianxo.gal ou no teléfono 881988891).

Convocatoria de axudas para pemes, micropemes e autónomas

2018-06-04T12:42:19Z

O Diario Oficial de Galicia publicou o pasado luns 28 de maio as bases do Programa de axudas para implantar a responsabilidade social empresarial (RSE), a igualdade laboral e a conciliación laboral e persoal, cofinanciadas polo programa operativo FSE Galicia 2014-2020, que inclúe incentivos de ata 12.000 € para promover entre as pemes, micropemes e persoas autónomas a obtención de certificados en RSE, a elaboración e implantación de plans de igualdade e a conciliación con apoios ao teletraballo e para a flexibilidade horaria.

As empresas solicitantes poderán ser pemes, micropemes ou persoas traballadoras autónomas, que teñan subscritos contratos con persoas traballadoras por conta allea, con domicilio social e centro de traballo en Galicia, calquera que sexa a súa forma xurídica, e que estean validamente constituídas no momento de presentar a solicitude de axudas, e deberán contar cun mínimo de 5 persoas traballadoras.

Tamén poderán presentar solicitude as empresas con axencia, sucursal, delegación ou calquera outra representación en Galicia que deberán ter contratado nesta Comunidade Autónoma un mínimo de 8 persoas.

Extracto da orde