Notas de Prensa

O goberno local e o grupo municipal do PSdeG-PSOE asinan un acordo para a aprobación das dedicacións do executivo rianxeiro

2024-04-02T12:55:59Z

O Alcalde de Rianxo, Julián Bustelo, e mailo voceiro do grupo municipal do PSdeG-PSOE, Óscar Rial, asinaron esta mañá o acordo que permitirá aprobar as dedicacións dos membros do executivo. A dito acto tamén asistiton:
Ademais, o acordo achanda o camiño para a aprobación do orzamento municipal para o exercicio 2024, unhas contas fundamentais para sanear a economía municipal nas que se seguirá traballando nos próximos días, dándolle continuidade así ás xuntanzas levadas a cabo entre os grupos municipais de Rianxo en Común e do PSdeG-PSOE.

O Alcalde, Julián Bustelo, comezou dicindo que “a política é, precisamente, isto que estamos facendo hoxe, é chegar a acordos, a consensos, e pensar fundamentalmente nos veciños e veciñas, que son aos que nos debemos. Este acordo que asinamos hoxe é un acordo que non beneficia nin a Rianxo en Común, nin ao Goberno, nin ao PSdeG-PSOE. É, porén, un acordo que vai beneficiar a toda a cidadanía do noso concello, que aporta estabilidade e un punto de encontro entre as formacións asinantes a partir do que estou seguro que xurdirán futuros acordos para a mellora das infraestruturas e dos servizos municipais”.

Bustelo destacou o traballo levado a cabo polas dúas formacións e agradeceu a disposición e iniciativa do PSdeG-PSOE para buscar o consenso.

Pola súa parte, o voceiro do grupo municipal do PSdeG-PSOE, Óscar Rial expresou “a súa gratitude cara a todas as partes involucradas no proceso de negociación, destacando a vontade da agrupación socialista de cara a chegar a este acordo, e destacou o compromiso compartido de traballar en beneficio de todos os cidadáns de Rianxo.

Ademais, subliñou a importancia da colaboración e o diálogo continuo para lograr resultados significativos e sostibles a longo prazo. “Esperamos traballar en estreita colaboración para poder levar a cabo os puntos que se acordan neste escrito que asignamos hoxe e como punto de partida para futuras implementacións de iniciativas e proxectos que impulsen o desenvolvemento económico, social e cultural do noso Concello”.

O acordo recolle dez liñas estratéxicas de traballo a abordar de maneira conxunta durante os vindeiros meses:
    • Abordar a modificación do acordo asinado co Concello de Boiro en materia de servizos sociais.
    • Constitución dunha mesa de traballo coa finalidade de que ambas formacións desenvolvan unha proposta de Plan Concilia Municipal.
    • Revisión das subvencións nominativas que perciben as entidades deportivas municipais, apostando por un modelo de concorrencia competitiva. Revisarase á alza e de maneira equitativa os importes que as diversas entidades perciben.
    • Revisar as bases das axudas escolares municipais.
    • Abordar o proceso de licitación do servizo de abastecemento de auga e saneamento.
    • Abordar o proceso de licitación do servizo de recollida do lixo e limpeza viaria.
    • Abordar a creación da Coordinara de Anpas.
    • Convocatoria do Consello Escolar Municipal antes da finalización do curso 2023-2024.
    • Convocatorio da Mesa de Comercio Local durante o mes en curso.
    • Seguimento do proxecto de construción dunha residencia pública no noso municipio.

Rianxo, 1 de abril de 2024

Sarela abrirá en Rianxo coa colaboración do Concello un punto de información especializado en dano cerebral

2024-02-26T13:44:04Z

Sarela abrirá en Rianxo coa colaboración do Concello un punto de información especializado en dano cerebral

O punto de Rianxo dará tamén servizo a Dodro e Lousame e súmase aos da Estrada, Ribeira, Arzúa, Lalín e Mazaricos que xa viñan funcionando.
O obxectivo destes puntos é achegar a información ás familias con DCA que viven máis lonxe de Santiago e detectar as súas necesidades de atención.
Estará nas dependencias municipais de Servizos Sociais Comunitarios (Estrada de Tanxil, 12).
A atención será gratuíta e con cita previa que se pode concertar no teléfono de Sarela 981 577 037 ou a través dos servizos sociais dos concellos.
O mércores 28 ás 17:00 horas celebrarase unha charla informativa sobre aspectos xerais do dano cerebral no Auditorio de Rianxo.

Sarela (Asociación de Dano Cerebral Adquirido de Compostela) abrirá esta semana un novo punto informativo especializado en dano cerebral adquirido en Rianxo. A colaboración do Concello de Rianxo fai posible o funcionamento deste punto de información nas dependencias municipais de Servizos Sociais Comunitarios (Estrada de Tanxil, 12) e que tamén atende á poboación Dodro e Lousame. Esta mañá o punto de información foi anunciado en rolda de prensa polo alcalde de Rianxo, Julián Bustelo, o secretario de Sarela, Luciano Fernández Pintor, a concelleira Benestar Social, Igualdade, Maiores e Xuventude, Ana Vidal, e a coordinadora do Servizo de información a familias de Sarela, Olalla Domínguez.

O punto de información de Rianxo é o segundo que entrará en funcionamento na Barbanza ao sumarse ao que xa funciona no hospital de Ribeira. Con este, Sarela xa ten na Área sanitaria de Santiago e Barbanza sete puntos de información: Estrada, Arzúa, Lalín, Mazaricos, ademais de en Santiago e os citados de Ribeira e Rianxo.

O esforzo realizado por Sarela para atender estes puntos de información encádrase no obxectivo de achegar información ás familias con dano cerebral adquirido que viven máis alonxadas de Santiago e detectar as súas necesidades de atención.

O dano cerebral é hoxe a primeira causa de discapacidade e dependencia en España. O ictus, os traumatismos cranioencefálicos, os tumores cerebrais, a falta de osíxeno por unha parada cardiorespiratoria ou un afogamento son as causas máis frecuentes desta discapacidade que hoxe afecta en Galicia a unhas 35.000 persoas. A información e o apoio ás familias cunha persoa con dano cerebral adquirido son fundamentais ao ter que afrontar unha nova realidade que chega de forma brusca e inesperada.

Como funcionan os puntos de información?

Todas as familias dos concellos de Rianxo, Dodro e Lousame, nas que algún dos seus membros teñan dano cerebral, poden pedir cita para asistir a este punto de información que é gratuíto. É necesario cita previa, que se pode solicitar a través do teléfono 981 577 037 de Sarela ou a través dos servizos sociais dos concellos.

No punto de información unha traballadora social de Sarela ofrecerá información e orientación sobre o dano cerebral relacionados coa volta ó domicilio despois da alta hospitalaria, recursos e servizos aos que pode ter dereito a persoa, servizos dirixidos á familia e persoa coidadora. Tamén existe a posibilidade de que a atención sexa a domicilio en función das necesidades das familias.

No funcionamento dos puntos de información será clave a coordinación con outras unidades de referencia como atención primaria de saúde, servizos sociais e outros recursos comunitarios da zona.

Charla informativa o mércores 28 de febreiro

Xunto á atención do punto de información Sarela quere achegar a realidade do DCA á poboación xeral a través de diferentes actividades de sensibilización e prevención como charlas dirixidas a grupos de risco como terceira idade, colaboracións cos colexios e institutos, etc.

Con este obxectivo o vindeiro mércores 28 de febreiro ás 17:00 horas celebrarase no salón de actos do auditorio de Rianxo unha charla dirixida á poboación xeral na que se abordarán aspectos xerais sobre o dano cerebral: causas, prevención, recursos de atención etc. A charla será dirixida pola educadora social de Sarela Noelia Nieto. É necesaria inscrición previa a través do teléfono 664.185489 ou no correo ana.vidal@concelloderianxo.gal.

...................................................................................................................................

Sarela (Asociación de Dano Cerebral Adquirido de Compostela)

Sarela é unha entidade sen ánimo de lucro creada en decembro de 2000 por familiares e persoas con dano cerebral adquirido (DCA) e que desenvolve o seu labor fundamentalmente nos concellos que configuran a área sanitaria de Santiago.

Ten como obxectivos fundamentais promover a defensa conxunta dos dereitos destas persoas e familias; a súa integración e normalización social, e o seu coidado, asistencia e protección. Entre os fins principais da asociación tamén están os de orientación e información así como o de prevención do DCA e os seus efectos.

Máis información en www.sarela.org

O Concello de Rianxo convoca 59 prazas dentro do proceso de estabilización do emprego

2022-12-29T08:32:40Z

O Boletín Oficial da Provincia publicou o xoves 29 de decembro bases dos procesos selectivos convocados para a cobertura de prazas dentro do proceso extraordinario de estabilización. Este proceso sinalado por Lei e obrigado por un mandato da Unión Europea permitirá reducir a temporalidade no emprego público no conxunto xeral das administracións locais por debaixo do 8%.

Unha vez asinado o decreto por parte da Alcaldía publicáronse as bases dos procesos selectivos para a cobertura das 59 prazas, ao abeiro da Lei 20/2021, do 28 de decembro, de medidas urxentes para a redución da temporalidade no emprego público.

O alcalde salientou a importancia do proceso xa que se acadará "o obxectivo principal de redución da temporalidade do emprego no Concello de Rianxo, co conseguinte beneficio tanto para os traballadores e traballadoras como para a calidade dos servizos públicos que se prestan á veciñanza".

As prazas convocadas, 59, sairán polo sistema do concurso, segundo o previsto nas disposicións adicionais 6ª e 8ª da Lei 20/2021. Delas, 1 correspóndense con posto de persoal funcionario e 57, de persoal laboral. As solicitudes poderán presentarse dende o día seguinte á publicación dos correspondentes anuncios no Boletín Oficial do Estado.

Acordo con todos os sindicatos

Neste proceso de estabilización incluíronse as prazas de funcións estruturais cubertas con persoal funcionario interino ou laboral temporal con data anterior a 1 de xaneiro de 2021 logo das negociacións entre o goberno municipal e todas as organización sindicais con representación na Mesa de Negociación.

Praza de Conserxe por oposición libre. Técnico/a de Administración Xeral

No transcurso da negociación aprobouse tamén a creación da única praza de funcionario que, por razóns da aínda vixente taxa de reposición estatal, impide cubrir prazas excepto cando haxa xubilacións. Esta praza para o 2023 será de funcionario/a por oposición libre. O alcalde salientou a necesidade de que se modifique a citada taxa para posibilitar sacar máis prazas por oposición libre. Nestes momentos está en marcha un proceso de oposición libre para dotarse dun técnico/a de Administración Xeral.

Rexeitamento do goberno municipal dos actos contra a tolerancia e o respecto aos símbolos LGTBI

2022-12-19T09:27:08Z

O grupo de goberno do Concello de Rianxo rexeita contundente e firmemente os actos que se realizaron contra un dos bancos pintados no Paseo Marítimo de Setefogas coa bandeira do arco da vella, o símbolo da tolerancia, respecto e compromiso cos dereitos LGTBI. Non é un acto vandálico máis contra o patrimonio de todos e todas, xa de por si condenábel, senón que entendemos vai contra o que representa que é a tolerancia entre as persoas e a loita polos dereitos que preside e debe presidir o municipio.

Evidentemente, mentres a Policia Local buscará dar cos culpábeis de mover e guindar ao mar o banco, a brigada de obras repoñerao e non só iso, senón que ten a encomenda de realizar máis repintados similares nos bancos ubicados na zona, pois de ningunha maneira se vai permitir gañen os intolerantes e homófobos esta loita contra o respecto.

Os feitos tiveron lugar probabelmente a noite do venres ao sábado no que a marea baixa deixou ao descuberto da auga o banco multicor instalado no lugar desde o pasado novembro como un dos actos desta data da non violencia contra as mulleres. A Policía Local procedeu a retiralo do mar e recuperalo para a súa posterior reposición. Intensificará a súa vixilancia e control para dar cos causantes desta acción tan covarde.

O Festival Titiriberia celebrará en Rianxo entre o 22 e 30 de decembro a súa quinta edición

2020-12-16T12:41:12Z

Martes , 15 de decembro de 2020

O Festival Titiriberia, organizado pola Asociación Morreu o Demo coa colaboración do Concello de Rianxo e a Deputación da Coruña, celebrará a súa quinta edición en Rianxo entre os días 22 e 30 de decembro. En total, unha ducia de funcións conformarán o programa deste ano, no que tamén se inclúen mesas redondas, exposicións e obradoiros. Así o explicaron hoxe en rolda de prensa o alcalde de Rianxo, Adolfo Muíños Sánchez; a tenente de alcalde de Rianxo, Mari Carmen Figueira Ares; o deputado de Cultura da Deputación da Coruña, Xurxo Couto, e a responsable de produción do festival, a titiriteira Larraitz Urruzola, e Anxo García, titiriteiro e membro fundador da Asociación Morreu o Demo. Nesta edición de 2020, a primeira que se celebrará en Rianxo tras catro anos no municipio de Teo, o Titiriberia incluirá unha programación cuxo obxectivo principal será, un ano máis, achegarlle ao público a longa tradición do títere tradicional, xénero escénico cun gran arraigamento histórico na cultura galega. Neste ano tan insólito e complexo por mor da pandemia, o festival adaptarase ás circunstancias, cumprindo co máximo rigor con todas as medidas sanitarias en canto á protección individual e a limitacións de capacidade. Ademais, para garantir o máximo acceso posible do público, poderase seguir pola rede o conxunto da programación a través da canle https://www.youtube.com/user/morreuodemo

Ao longo dos sete días presenciais que durará o festival, pasarán por Rianxo compañías como Viravolta Títeres, Diáspora Teatro, Seisdedos Marionetas, Fantoches Baj, Títeres Cascanueces, Xirapaus ou a Cova das Letras, o colectivo Indignati Asociación Galega de Commedia dell’Arte, artistas como Fran Rei, Borxa Insua, Iria Pinheiro, Lucho Penabade, Tero Rodríguez, Borxa Insúa e Esther Carrodeguas, ou grupos de música como Áureas. Todos estes nomes, referentes no ámbito escénico, tecerán coas súas actuacións o programa deste Titiriberia en Rianxo que, ademais, terá na descentralización unha das súas características, xa que os espectáculos se repartirá por diferentes espazos: Auditorio de Rianxo, Casa de Cultura Cuartel Vello, Centro Social da Atalaia-Asados, Centro Cultural e Deportivo de Taragoña, Centro Sociocultural A Capela do Araño ou os soportais da Praza Castelao.

A programación comezará o vindeiro martes, 22 de decembro, da man da compañía Viravolta Títeres, que ofrecerá no Centro Sociocultural A capela do Araño dous pases (ás 17.00 e ás 19.00) do seu espectáculo O horroroso crime de Xan Miñoca, espectáculo de títeres de cachaporra con música de piano en directo. Será ese o inicio dun programa que, entre os seus pratos fortes, conta con As varietés do Barriga Verde, un formato multidisciplinar que mestura os monicreques co cabaré, a música, a poesía ou o escapismo. Así, o último día do Titiriberia, o 30 de decembro ás 20.00 h, no Auditorio Municipal de Rianxo actuarán Esther Carrodeguas, Tero Rodríguez, Lucho Penabade, Pajarito, María Dobronich, Borxa Ínsua e Lázaro Duyos. As varietés de Barriga Verde estará conducido por Iria Pinheiro e contarán co acompañamento escénico-musical do grupo Áureas.

Commedia Dell’Arte e cachaporra
Nesta edición, terá unha interesante presenza a commedia dell’Arte, xénero teatral que protagonizará diferentes aspectos do programa. Deste xeito, o actor, director e profesor na Escola Superior de Arte Dramática (ESAD) ofrecerá a conferencia Commedia dell’Arte: artesanía teatral, o sábado 26 de decembro ás 19.30 no Centro Sociocultural A capela do Araño. O propio Llera impartirá, por outra banda, un Obradoiro de iniciación á Commedia dell’Arte os días 26 e 27 no mesmo recinto.

Outro das actividades que destacan da programación é a mesa redonda que terá lugar o vindeiro 28 de decembro ás 20.00 h no Auditorio de Rianxo que, baixo o título A innovación da Cachaporra. Novos xeitos para traballar a tradición, que reunirá a Santi Prego, Inacio Vilariño e Alba Grande. Moderada por Comba Campoi, a mesa centrarase na tradición e na innovación no histórico xénero da cachaporra.

A Mesa de negociación do Concello de Rianxo acorda novos textos reguladores para o persoal municipal

2020-12-04T12:13:32Z

A Mesa de Negociación do Concello de Rianxo aproba por unanimidade un novo Convenio colectivo para o persoal laboral, o Acordo regulador para os funcionarios, un Regulamento de teletraballo e o Regulamento de segunda actividade para todo o persoal ao servizo do Concello de Rianxo.

Os textos aprobados implicaron na negociación ao conxunto do Comité de Empresa, a representante do funcionariado e os sindicatos CIG, UXT, CCOO e CSIF e por parte do Concello, á Alcadía. En conxunto a valoración do acordado foi moi positiva e o último chanzo antes da futura aprobación da relación de postos de traballo ou RPT que se prevé finalizar nuns meses.

Agora, tras o paso pola mesa de Negociación, elevaranse ao pleno municipal de ser preceptivo para a súa ratificación.

Ademais da posta ao día do Convenio colectivo e do Acordo regulador, o Regulamento de teletraballo supón unha ferramenta para establecer os protocolos de funcionamento da administración e dos departamentos non só en tempos de pandemia, senón nun novo xeito de traballar por tarefas, favorecendo a conciliación, con obxectivos e garantindo sempre a atención presencial. Esta será sempre semanalmente de polo menos dúas xornadas, pois o teletraballo, voluntario e acordado polas partes, empresa e traballador/a, nunca superará o 50% da xornada mensual.

O Regulamento de segunda actividade sae o paso de situacións e problemas físicos para desempeñar as tarefas ordinarias por parte do persoal traballador que, sen embargo, non impiden seguir con outras tarefas en postos diferentes, evitando o cese da relación laboral prematuramente, coa conseguinte redución de dereitos e salarios laborais, e seguindo este traballo até a súa extinción a pedido da persoa traballadora. Xa existía para a Policía Local por lei e quíxose ampliar esta prestación para o conxunto do cadro de persoal.

Cortes do tráfico polo I Tríatlon Concello de Rianxo

2017-09-01T11:22:44Z

O vindeiro 2 de setembro celebrarase o “I Tríatlon do Concello de Rianxo”, que discorrerá polo centro urbano e zona portuaria.

Coa finalidade de garantir a seguridade das persoas participantes, procederase a cortar o tráfico no percorrido e horas de seguido sinaladas.

Data e hora: sábado, 2 de setembro de 2017, de 16.45 a 18.45 horas.

Percorrido: Rinlo, Setefogas, Paseo da Ribeira, Paseo do Porto, rúa entre galpóns novos do peirao, Autores da Rianxeira, estrada de Tanxil ata Xogo dos Bolos, e DP-3301, entre o Xogo dos Bolos e o lavadoiro de Brión.

Cortes de tráfico:

Queda cortado o tráfico cara a Rianxo, no lavadoiro de Brión, para os vehículos que acceden a Rianxo procedentes da ponte de Catoira, Isorna e Leiro.
Queda cortado o tráfico cara a Leiro-Isorna-ponte de Catoira no Xogo dos Bolos.
Queda cortado o tráfico pola estrada de Tanxil, desde o Xogo dos Bolos, Autores da Rianxeira, Paseo da Ribeira, Paseo do Porto, Setefogas e Rinlo.
Non poderán moverse os vehículos estacionados nas vías sinaladas no punto anterior e na DP-3301, entre o lavadoiro de Brión e o Xogo dos Bolos. E ademais non poderán abandonar a zona todos os vehículos que se encontren entre as citadas vías e a fachada marítima, se teñen que acceder a elas.
As zonas das que non se poderá saír son: rúa sen nome fronte a correos en Rinlo, aparcamentos de Setefogas e da área da parada de autobuses, garaxes da zona interior do xardín interior do Paseo da Ribeira, zona portuaria, Loureiros, Castillo, Carbaxales de Arriba e Abaixo, Pedra Vixía, Punta Fincheira, Quenxo, Tanxil, Cortes (lado marítimo), Tronco, Pedreira, e Pozos (lado marítimo).
A parada de autobuses de Rianxo trasladarase á rotonda do colexio Castelao.

Prégase a colaboración da veciñanza, para que, se ten previsto a utilización dos vehículos nas franxas horarias sinaladas, os retire dos lugares afectados con antelación suficiente para evitar contratempos e esperas innecesarias.

Aprobación da Conta Xeral de 2015

2016-12-07T08:55:24Z

O Concello de Rianxo deu a aprobación da Conta Xeral do ano 2015 na sesión plenaria do pasado xoves, 1 de decembro, dando así cumprimento ao último trámite para a súa aprobación definitiva e a súa remisión ao Consello de Contas para posterior fiscalización.

Foi apoiada polo executivo en solitario coa abstención dos grupos da oposición. A Conta Xeral é o documento que pon de manifesto a xestión realizada nos aspectos económicos, financieiros, patrimoniais e orzamentarios ao longo do ano ao que se refire (2015).

Neste sentido e tal e como define a normativa que regula a contabilidade local (HAP/1781/2013) a conta xeral da entidade mostrará a imaxe fiel do patrimonio, da situación financeira, dos resultados e da execución do orzamento.

Inclúe os seguintes documentos:

O balance
A conta de resultados económico patrimonial
O estado de cambios no patrimonio neto
O estado de fluxos de efectivo
O estado de liquidación
A memoria

O principal documento de fiscalización da actividade política do concello constitúeo o estado de liquidación do orzamento, que se convirte nun elemento avaliador do grao de consecución dos obxectivos previstos e concretados no orzamento. Neste documento contense un diagnóstico da situación económica do concello ao longo do ano 2015 que a respecto da anualidade conclúe cuns dados que inciden na melloría xeral do estado de contas do Concello, entre outros:

- Pásase dun remanente de tesouraría para gastos xerais negativo no 2014 a un valor positivo neste ano 2015. Isto permite, entre outras cousas volver ter a capacidade para o financiamento de novos investimentos, o que se traduce na nova petición de crédito para o programa nas escolas unitarias, ou de arranxo de pistas municipais.

- Mellora tamén o aforro neto, unha das magnitudes máis importantes, de aí que o servizo de intervención considere cumpridos os obxectivos do Plan de saneamento financieiro previsto para o 2015-2018, ao conseguilo xa no seu primeiro ano.

- A mellora xeral do equilibrio orzamentario. En relación á anualidade de 2014 pásase de 97.014,68 euros a 227.510,20 euros o que supón un incremento do 7,7% nese equilibrio dos ingresos en Rianxo en relación os gastos.

- Seguiuse coa redución considerábel da carga financeira destes anos, que pasa de representar un 18,51% do orzamento en 2014 a un 12,42% no exercicio de 2015. Isto permitiu, entre outras cousas, destinar a gasto corrente parte do que se pagaba aos bancos, e mellorar a capacidade de realizar actuacións por parte do concello.

- Finalmente a débeda comercial mellorou, no segundo trimestre de 2016 o Período Medio de pago a provedores (PMP) acadou o valor de 30,49 días. Aínda fica moito por mellorar (viñamos de 70 días) e baixar desa porcentaxe pero en xeral é constatábel o bo camiño a seguir.

- Debemos tamén conseguir presentar este documento (a conta xeral) con maior antelación (dous meses antes).

A mellora destes números e magnitudes, a estabilizade orzamentaria e o estado de contas global explica que a día de hoxe se poida participar de programas que hai uns anos era impensábel pois carecíamos de capacidade de endebedarnos, solicitar préstamos ou pedir axudas que non foran do 100%.

Hoxe, con esforzo de todos, sen fachenda e con traballo constante, existe vía libre para ir financiando actuacións, participando de axudas que ás veces esixen que o concello poña o 20% ou até do 50%.

O Concello de Rianxo cooperará con AGADEA para dar servizo de atención diúrna á veciñanza con deterioro cognitivo

2016-12-01T09:57:16Z

O Concello de Rianxo, desde a Concellería de Benestar Social de Rianxo e da man da Asociación Galega para a Axuda dos Enfermos con Demencia Tipo Alzheimer (AGADEA) iniciou as xestións para a posta en marcha dun Servizo de Atención Diurna. Este servizo implantará “TERAPIAS DE ESTIMULACIÓN COGNITIVA” dirixidas a persoas con deterioro cognitivo, Asociado a Alzheimer ou outras demencias neurodexenerativas.

Estamos ante un servizo que dará cabida a unhas 22 persoas (cun grupo de deterioro leve e outro moderado) que serán atendidas 4 horas ao día de luns a venres por persoal técnico de AGADEA, experto en Terapia Ocupacional, Atención Sociosanitaria, Traballo Social e Psicoloxía. Supón un primeiro paso para dar prestacións que deberían estar cubertas por un Centro de Día na localidade e que até o de agora non impulsou a Xunta no noso Concello. Agadea xestiona o Centro de Día especializado en Alzheimer en Ribeira.

As actividades, en horario alternativo de catro horas de mañá ou tarde, de luns a venres, serán contacto social, estimulación da atención e da concentración, estimulación da lectura, escritura, cálculo, musicoterapia, laborterapia, motricidade fina e psicomotricidade. Para o desenvolvemento do servizo esíxese un número mínimo de persoas participantes entre os 4/5 (mínimo) e os 22 (máximo).

O lugar elixido que se está a procurar para o Servizo de Día sería accesible e adaptado para persoas con mobilidade reducida, amplo e con prazas de aparcamento dispoñibles preto. Barállanse diferentes opcións de cesión ou alugueiro e a asociación adaptaría e espazo para os seus usos mentres se agarda a cobertura definitiva.

Son os primeiros pasos para ir xerando no propio concello unha atención que a día de hoxe a veciñanza busca fora pola negativa até o de agora da Xunta a construír e financiar en Rianxo o Centro de Día. Aínda así, nesta mesma semana, o Alcalde de Rianxo, Adolfo Muíños, solicitaba de novo unha reunión coa Consellería para, acompañado do resto dos grupos políticos da corporación rianxeira, solicitar a creación dese Centro de Día e seguir a ofrecer a nosa cooperación cedendo instalacións como o antigo ISM (Clínica Vella) ou terreos públicos para que se dote o concello dun servizo que afecta a 22 familias que a día de hoxe se despraza fora.

Rianxo, municipio contrario ao Tratado de Libre Comercio UE-Estados Unidos (TTIP)

2016-05-10T08:05:07Z

O pleno ordinario de abril do Concello de Rianxo declarou o noso municipio contrario ao Tratado de Libre Comercio (TTIP). Un tratado que están a negociar en segredo a porta pechada entre a Unión Europea e os Estados Unidos. Cun escurantismo impropio dunha democracia, onde se están a abrir á cidadanía canles para a participación, este tratado negóciase dun xeito escurantista e con severísimas restricións de acceso e control dos seus contidos mesmo aos parlamentarios europeos.

Despois dun primeiro intento no mandato de anterior (novembro 2014) de aprobar unha iniciativa do BNG neste senso que non contou co respaldo maioritario da corporación, un novo intento permitiu aprobar unha moción similar de Rianxo en Común neste mes de abril, que desta volta si contou co respaldo maioritario e cuestiona a sinatura futura dese Tratado.

Son moitos os municipios de todo Europa que se están a unir contra esta nova ofensiva neoliberal que subordina a autonomía municipal (e mesmo dos parlamentos e do resto das administracións) aos lobbies das grandes industrias. Entre outros efectos de graves plantexa a redución das posibilidades de protexer os servizos públicos abrindo canles para unha privatización xeneralizada e tamén, en caso de conflito, os tribunais que os dirimirán non son os actuais do poder xudicial, senón uns tribunais especiais no que forman parte as empresas. Nin que dicir do difícil acceso para a defensa dos intereses de concellos pequenos como o noso.

Sectores chave da economía local de Rianxo como é a produción mexilloeira tamén serían afectados coa supresión de controles as importacións o que supón se cabe aínda máis facilidades aos produtos foráneos que terían as portas abertas competindo en desigualdade. Ou a entrada masiva de sementes, produtos tranxénicos, pesticidas, fertilizantes, que se beneficiarían da menor protección americana e verían a súa entrada libre en Europa.

Nota de prensa sobre a posta en marcha do dominio .gal no Concello de Rianxo e a migración ao Software Libre

2015-05-18T09:55:34Z

Con motivo do 17 de maio, Día das Letras Galegas, o Concello de Rianxo está a completar a posta en marcha do seu dominio rianxo.gal. Todos os contidos da web municipal están incorporados ao novo dominio.

Ademais dos contidos que migraron ao novo dominio os correos electrónicos dos diferentes departamentos xa atenden pola nova denominación .gal.

Sumámonos así ao proceso iniciado pola sociedade civil de Galicia que impulsou o recoñecemento do puntogal como dominio galego en internet e que da visibilidade no mundo dixital ao noso país.

E, tamén nesta xornada compartida polas nosas letras co Día de Internet, o concello pon en valor tamén a Migración ao software libre do Concello de Rianxo.

O Concello de Rianxo está a completar a migración de todos os seus sistemas informáticos a Software Libre.

O Software Libre é aquel que garante dereitos e non impón prohibicións a quen o utiliza, e en consecuencia permite coñecer como está feito e como funciona e non impón restricións sobre a finalidade do seu uso.

A liberación do software e dos formatos de documentos é un compromiso cunha filosofía de transparencia, garantía de seguridade e privacidade, liberdades de uso, cometido e elección, e universalidade do coñecemento.

As administracións públicas teñen o deber moral de serviren de referente na liberación dos sistemas informáticos das estratexias empresariais prohibitivas e monopolizadoras coa fin de conseguir unha independencia tecnolóxica que garanta unha compatibilidade plena de programas e documentos entre sistemas agora e no futuro.

Como consecuencia, a adopción de sistemas libres supón tamén un aforro en licenzas de uso que o único que fan é restrinxir o uso que lle podemos dar a ese software que priva de liberdades.

Todo proceso de cambio supón de entrada un esforzo por parte de todos os axentes implicados. No caso do Concello de Rianxo todo o proceso foi relativamente sinxelo e gradual, sen grandes problemas e con relativa axilidade na solución das complicacións, grazas tamén á comprensión e paciencia do persoal municipal.

Aínda non está todo o proceso rematado e quedan ocos por resolver, pois non todas as administracións coas que o Concello de Rianxo ten interacción electrónica proporcionan ferramentas compatibles con todas as plataformas tecnolóxicas, pero é un camiño que avanzou moito nos últimos anos e no que se seguen a dar pequenos pasos continuados, aos que hai que sumar a boa disposición dos servizos informáticos da Deputación da Coruña, dos que depende gran parte do noso funcionamento interno, que están a facer o esforzo de adaptar as tecnoloxías existentes a todas as plataformas para dar entrada aos concellos que, coma nós, veñen apostando polo Software Libre.

Ampliación do prazo de presentación de alegacións ao Plan Xeral

2015-01-30T14:01:51Z

O grupo de goberno presentará o xoves 29 de xaneiro no Pleno Municipal a ampliación do prazo de exposición pública do PXOM de Rianxo, que se aumentará, de aprobarse, até o 3 de marzo.

Buscar o máximo consenso e participación pública, incorporar moitas das alegacións presentadas e seguir a traballar na mellora do plan, móvenos a presentar esta proposta que agardamos conte con amplo respaldo, pois tamén foi solicitado pola Asociación Rianxeira de Empresarios, Leiras de Rianxo e o propio Partido Popular.

É unha vontade de diálogo e mellorar que continuará incluso despois do peche das alegacións.

Documento de aprobación inicial do PXOM de Rianxo

Presentación da aplicación móbil Mobilízate!

2013-03-20T14:04:44Z

O pasado 19 de marzo pola mañá, no Salón de Plenos do Concello de Rianxo, presentouse Mobilízate!, unha aplicación para dispositivos Android que pretende facilitar a participación cidadá así como favorecer a máxima eficacia e integración entre o Concello de Rianxo e os seus cidadáns e visitantes.

Este sistema, un dos pioneiros en Galicia, vai permitir que os mesmos veciños comuniquen en tempo real ao Concello os desperfectos que atopen. Por medio dun proceso sinxelo podese enviar desde o dispositvo móbil, en calquera momento, e dende calquera lugar, información de fallos no alumeado público, sinais de tráfico defectuosas, mobiliario en mal estado, rúas con deficiencias ou calquera outra que sexa de interese notificar.

Os veciños poderán enviar fotos e xeocalizar o punto no que actuar. Non se trata simplemente dun buzón de queixas xa que o cidadán, se así o prefire, recibe notificación do seguimento con resposta a súa demanda, convertendo así o sistema nunha nova canle de comunicación entre a administración local e os veciños.

A ferramenta está disponible para a súa descarga en Google Play. É de destacar que o 91% dos cidadáns dispoñen dun telefono “conectado”, confirmandose que o 64% dos españois acceden a Internet desde o seu smarthphone, e que os dispositivos Android son os máis numerosos no mercado.

A empresa responsable da posta en funcionamento deste sistema de información corporativa é eLaboro, de capital 100% galego, entidade con sede en Santiago de Compostela, que desenvolve a súa actividade profesional no ámbito da consultoría tecnolóxica e de organización, especialmente no entorno da Administración Pública, sendo o seu principal obxectivo a enxeñaría do software.

Na presentación e posta en funcionamento de Mobilizate! estiveron presentes responsables e técnicos da empresa eLaboro, a quen acompañaron o Alcalde, Adolfo Muiños e o Tenente de Alcalde, concelleiro responsable de novas tecnoloxías, Carlos Gey.

O rexedor agradeceu á empresa eLaboro que fora Rianxo o municipio escollido para presentar este sistema novidoso en Galicia, suliñando que así se daba un paso máis no camiño de posibilitar a participación cidadá ao tempo de facilitar unha resposta máis inmediata aos problemas existentes.

Carlos Gey destacou do novo sistema que 2era económico ao non precisar de investimentos extras ao tempo de aforrar tempo e cartos aos veciños nas súas notificacións ao Concello; sinxelo de usar ao non requerrir doutros coñecementos que non sexan os propios dun usuario de telefonía móbil e, por riba de todo, por ser un sistema de comunicación áxil e transparente, quedando constancia rexistrada do comunicado polos veciños”.

Entendendo que o éxito ou fracaso do sistema vai depender do uso que os veciños e traballadores do concello fagan del, nos próximos días pórase en marcha unha campaña de comunicación co obxectivo de dar a coñecer as vantaxes de Mobilizate!, que como seu nome indica busca mobilizar aos veciños na procura da súa participación por medio das novas tecnoloxías.

Mobilizate! incorpora no seu deseño a tipografía e cor azul da imaxe corporativa que distingue ao Concello de Rianxo.

Nota de prensa do Día Internacional contra a Violencia de xénero

2012-11-23T13:25:18Z

Día Internacional contra a Violencia de Xénero

Para conmemorar o día Día Internacional contra a Violencia de Xénero o Concello de Rianxo ten programado para o próximo domingo día 25, ás 12:00 hrs., unha concentración diante da Casa Consistorial onde se dará lectura a un manifesto por parte de concelleiros e concelleiras.

Un gran lazo violeta será instalado no balcón do concello.

Acto literario

A continuación, darase inicio a un acto literario no que, con música en directo, os veciños e veciñas que o desexen participarán na lectura de textos relacionados coa violencia de xénero.

Compromiso de Non Violencia

A concellería de Igualdade do Concello de Rianxo pon en marcha unha sección de Compromiso de Non Violencia dirixida a todos veciños e veciñas que queiran participar coas súas propostas, ideas, denuncias ou suxestións.

Co obxectivo de que a participación teña continuidade no tempo habilitáronse diferentes vías de participación nas redes sociais e no web municipal, co identificador "rianxo25n". Para dar a coñecer as diferentes opcións, o concello instalará este domingo unha mesa diante da Casa Consistorial na que se entregarán tarxetas de compromiso coa invitación a participar, dando a coñecer as direccións do web, correo-e e redes sociais creadas a favor da non violencia.

Adhesión á Rede Galega de Entidades Locais en contra da Violencia de Xénero.

O concello de Rianxo vén de asinar o protocolo para sumarse á "Rede galega de entidades locais en contra da violencia de xénero" posta en marcha pola Secretaría Xeral de Igualdade en colaboración coa FEGAMP.

Coa sinatura do modelo de adhesión, o Concello de Rianxo comprométese a desenvolver conxuntamente co departamento autonómico accións de sensibilización e prevención, informativas, formativas e de asistencia ás vítimas.

Accións a desenvolver

Como integrante na rede, o concello de Rianxo ten solicitado unha serie de accións das que oferta a Secretaría Xeral de Igualdade, como un obradoiro de autodefensa para mulleres vítimas de violencia de xénero, un espectáculo lúdico-musical e pedagóxico que analiza os roles de xénero que transmiten as cancións de temática amorosa, unha intervención de terapia ocupacional con menores expostos a situacións de violencia de xénero a través das artes plásticas ou unha exposición gráfica de ilustracións de diferentes artistas sobre a violencia de xénero e a mocidade.

Concellería de Igualdade
Concello de Rianxo

www.rianxo.com/rianxo25n

Nota de prensa: medidas de apoio ás familias en perigo de desafiuzamento

2012-11-22T09:35:08Z

O Goberno Municipal de Rianxo levará para a súa aprobación polo pleno de novembro de Rianxo unha serie de medidas de apoio ás familias ou persoas en perigo, actual ou futuro, de seren desafiuzadas polas entidades bancarias. Manterá como até o de agora o contacto coas plataformas comarcais de afectados para colaborar. Entre outras medidas impúlsase a:

Creación dunha Comisión Especial para atender casos de desafiuzamentos, composta por responsábeis dos Servizos Sociais municipais, portavoces municipais e plataformas contra os desafiuzamentos. Estudará a posibilidade de axudas ao alugueiro e para evitar o corte de subministracións básicas como auga, gas ou luz e acceso banco de alimentos municipal.
Orientación e asesoramento legal aos/ás veciños do municipio que teñan problemas para facer fronte ao pago dos compromisos adquiridos para a compra das súas vivendas habituais e non acadasen un acordo previo coa entidade bancaria correspondente.
Interesar das entidades bancarias e de aforro información sobre posíbeis desafiuzamentos que afecten a familias do concello, a paralización dos que estean en marcha até que entre en vigor un novo marco legal e a súa colaboración coa Comisión Municipal creada para casos de desafiuzamento.
No suposto de falta de colaboración de entidades bancarias co Concello procederá na medida que sexa posíbel, a prescindir dos servizos que as mesmas poidan prestar ao Concello.
O Concello publicará na web municipal todos os datos das entidades bancarias socialmente comprometidas que paralicen os desafiuzamentos de vivendas radicadas no termo municipal, así como os nomes das que cooperen á hora de facilitar alugueres sociais substitutivos.
O Concello plantexará a redución máxima da cota tributaria do imposto de plusvalía para as persoas afectadas que sufran as perdas da súa vivenda en subhasta e para aquelas persoas que logren a dación da súa vivenda en pago da súa débeda, en aqueles supostos que a Lei o permita.
O Concello non facilitará a colaboración da policía local nos procesos de desafiuzamento das familias do municipio.

Instarase á Xunta de Galicia a que poña en marcha o servizo de Mediación hipotecaria ao tempo que reforce a política de aluguer social como medida paliativa de cara ás familias que se vexan expulsadas da súa vivenda habitual.

Instarase á Deputación da Coruña a que colabore co goberno autonómico nesta dirección, reforzando a coordinación e ampliación do gasto social dirixido a paliar os problemas da vivenda.

Reclamaremos unha nova Lei Hipotecaria que contemple entre outras:

Dación en pago ou extinción do crédito coa entrega da vivenda, garantindo o aluguer social da mesma vivenda sobre todo cando existan menores ou persoas dependentes.
Moratoria para deixar o pagamento das cotas hipotecarias temporalmente en suspenso cando se produzan circunstancias económicas difíciles como a perda de emprego ou o peche dun negocio.

Nota de prensa: acto de entrega de diplomas do Curso "A biomasa forestal"

2012-06-06T07:52:00Z

Mañá xoves 7 de xuño ás 11:30 horas, no salón de plenos do concello de Rianxo, celebrarase o acto de entrega de diplomas aos/ás asistentes ao curso sobre biomasa forestal e fomento do emprego. Curso no que colaborou o concello de Rianxo e que se realizou os pasados meses de abril e maio na parroquia de Asados. No acto de entrega estarán presentes os/as participantes e fará entrega dos diplomas de aproveitamento o Alcalde de Rianxo, Adolfo Muíños.