Bandos Informativos

Bando informativo sobre as fogueiras de San Xoan 2025

2025-06-18T11:24:29Z

Julián Bustelo Abuín, Alcalde do Concello de Rianxo, con motivo da realización de fogueiras no marco da celebración da festividade de San Xoán a noite do 23 de xuño de 2025, INFORMO:

Aquelas persoas que teñan intención de realizar unha fogueira nun terreo particular a noite do 23 de xuño de 2025 deberán presentar unha declaración responsable debidamente cuberta.

O modelo a cubrir pódese recoller no Rexistro Xeral do Concello de Rianxo.

Na dita declaración recóllense as medidas preventivas de obrigado cumprimento para garantir a seguridade de todos e de todas.

O prazo para presentar a declaración finaliza o 20 de xullo de 2025 ás 9:00 horas.

As persoas que fagan unha fogueira sen presentar en prazo e forma a preceptiva declaración responsable poderán ser sancionadas.

Rianxo, a 4 de xuño de 2025

Bando da Alcaldía sobre a manifestación contra o proxecto da factoría de Altri

2025-03-21T12:42:46Z

Veciños e veciñas, a autorización de impacto ambiental da Xunta de Galicia á megacelulosa de Altri representa unha grave ameaza para o territorio, para o noso medio de vida e o para o noso futuro.

A planta de Altri consumirá unha cantidade desmesurada de auga do río Ulla –máis que toda a provincia de Lugo – e prevé verter ao mesmo río 30 millóns de litros de auga ao día. Isto porá en risco a calidade das augas da ría de Arousa, afectando directamente ao sector mar-industria, o cal miles de postos de traballo directos e indirectos na nosa zona e supón un piar fundamental da economía da nosa bisbarra.

Por se todo iso fose pouco, o impacto negativo deste proxecto tamén pon en perigo explotacións agrogandeiras que producen alimentos de calidade e impulsará aínda máis o monocultivo do eucalipto, agravando a perda de biodiversidade e aumentando o risco de incendios forestais.

Polo anterior, insto á veciñanza a mobilizarse contra este proxecto e a participar na manifestación que terá lugar o sábado 22 de marzo ás 12:00 horas na Pobra do Caramiñal.

Bando Informativo sobre as obrigas de xestión da biomasa do Concello de Rianxo

2025-02-28T08:03:54Z

Bando informativo sobre o Xantar das Persoas Maiores 2024

2024-09-09T07:36:01Z

Julián Bustelo Abuín, Alcalde do Concello de Rianxo, INFORMO:

Ata o venres 13 de setembro estará aberto o prazo de inscrición no Xantar das Persoas Maiores 2024, unha xornada festiva e de confraternidade que como vén sendo habitual se celebrará o mércores das festas da Guadalupe, é dicir, o mércores 18 de setembro de 2024.

O evento terá lugar en Casa Pachín e terá un custo para as persoas asistentes de 20€. Un autobús recollerá ás persoas que queiran asistir en cada unha das parroquias.

As persoas interesadas en participar no Xantar das Persoas Maiores 2024 poden anotarse no Cuartel Vello no seguinte horario: de luns a venres de 11:00 a 13:00 horas e de 18:00 a 20:00 horas.

Fíxase un máximo de 200 inscricións.

Julián Bustelo Abuín
Alcalde do Concello de Rianxo

Bando Informativo sobre o programa Rianxo Termal

2024-09-04T15:45:46Z

Julián Bustelo Abuín, Alcalde do Concello de Rianxo, INFORMO:

O Concello de Rianxo, a través da Concellería de Política Social, organiza o programa RIANXO TERMAL, consistente nunha xeira de catro saídas ás Termas de Cuntis nos meses de outubro, novembro, decembro e xaneiro destinadas a persoas maiores de 50 anos empadroadas no noso municipio.

Datas:

As saídas, que se efectuarán en horario de tarde, serán nas seguintes datas:

10 de outubro de 2024
7 de novembro de 2024
5 de decembro de 2024
9 de xaneiro de 2025

Condicións:

O programa ten un custo de 80€ persoa, que inclúen a entrada ás termas os
catro días, así como o desprazamento en autobús dende Rianxo.
O programa está destinado a persoas maiores de 50 anos empadronadas no
Concello de Rianxo.

Inscricións:

O vindeiro día 2 de setembro abrimos o prazo de inscricións que se poden formalizar no Liceo Marítimo de Rianxo de luns a venres en horario de 10:00 a 13:00 horas ou a través dos seguintes teléfonos: 881 862 225 e 881 987 471.

Julián Bustelo Abuín
Alcalde-Presidente do Concello de Rianxo

Bando sobre o procedemento para cubrir a vacante de Xuíz/a de Paz titular

2024-08-27T10:10:44Z

Julián Bustelo Abuín, Alcalde do Concello de Rianxo, INFORMO:

O Concello de Rianxo vén de iniciar o procedemento para cubrir a vacante de xuíz/a de paz titular deste municipio, o cal se rexerá polas seguintes bases:

Requisitos das persoas candidatas:
• Ser español/a.
• Ser maior de idade.
• Non estar incurso en ningunha das causas de incapacidade establecidas no artigo 303 da Lei Orgánica 6/1985, de 1 de xullo, do Poder Xudicial.

Presentación de candidaturas:
• As persoas interesadas en optar ao cargo presentarán as súas candidaturas no Rexistro Xeral do Concello de Rianxo.
• O prazo de presentación de candidaturas é de quince días hábiles a partir da publicación do correspondente edicto no Boletín Oficial da Provincia.

Documentos que se achegarán á solicitude:
• Certificación de nacemento ou fotocopia autenticada do DNI.
• Certificación do Rexistro Central de Penados e Rebeldes e declaración complementaria de non estar inculpado ou procesado, conforme á Lei 68/1980.
• Certificado médico de non padecer doenza que incapacite para o exercicio do cargo.
• Declaración xurada de non estar incurso en causas de incapacidade para exercer o cargo.
• Xustificación dos méritos que se aleguen, de ser o caso.

Para máis información pode contactar co Concello de Rianxo a través do teléfono 981860075.

Bando en PDF

Bando informativo sobre a exposición pública do censo electoral

2023-06-07T07:44:53Z

Bando informativo sobre a apertura da Aula de Estudo

2022-08-30T09:54:40Z

Bando polo Día da Patria

2022-07-24T11:00:25Z

Incidencias na recepción da TDT

2022-07-07T07:45:36Z

As redes de telefonía móbil de nova xeración 4G e 5G están a ser despregadas no noso concello.

Esta tecnoloxía utiliza as bandas de frecuencia dos 800 e 700 MHz, que poden provocar interferencias co sinal da Televisión Dixital Terrestre (TDT).

No caso de que o acendido dun destes novos nodos de telefonía móbil provoque problemas na recepción do sinal da TDT, o Ministerio de Asuntos Económicos e Transformación Dixital pon a disposición da cidadanía un recurso gratuíto para resolver todas as reclamacións relativas a problemas coa recepción da TDT.

Se é vostede parte afectada por este cambio e deixou de recibir adecuadamente o sinal de televisión, pode pórse en contacto coa entidade xestora designada en:

• Teléfono: 900 833 999
• Web: www.llega700.es

De ser necesario, este servizo enviará unha empresa instaladora autorizada aos domicilios afectados que cursen a reclamación para facérenlles a adaptación de forma gratuíta.

Axudas para a adquisición de pastores eléctricos para a prevención dos danos ocasionados polo xabaril

2022-01-21T13:52:34Z

Bando informativo polo Día da Patria 2021

2021-07-24T12:15:37Z

Bando informativo polo Día da Patria 2021

Bando informativo sobre as limitacións e restricións no Concello de Rianxo pola COVID-19

2020-12-21T12:28:03Z

Diante da perigosa subida de casos de COVID 19 rexistrados nestes últimos días no noso Concello así como no resto da comarca Barbanza-Arousa Norte, faise un chamamento a manter tanto individual como colectivamente as normas vixentes antes de derivar en limitacións e sancións moito máis duras e restritivas. Varios locais comercais xa tomaron a decisión difícil, mais responsábel, de pechar os estabelecementos conscientes de que a saúde é a prioridade.

LIMITACIÓN DA LIBERDADE DE CIRCULACIÓN DAS PERSOAS EN HORARIO NOCTURNO
Durante o período comprendido entre as 23:00 e as 6:00 horas, agás:
1. Adquisición de medicamentos, produtos sanitarios e outros bens de primeira necesidade.
2. Asistencia a centros, servizos e establecementos sanitarios ou de atención veterinaria por motivos de urxencia.
3. Cumprimento de obrigas laborais, profesionais, empresariais, institucionais ou legais e retorno ao lugar de residencia habitual tras realizar algunhas das actividades previstas nestes apartados.
4. Asistencia e coidado a maiores, menores, dependentes, persoas con discapacidade ou persoas especialmente vulnerables.
5. Por outras causas de forza maior ou situacións de necesidade.

RESTRICIÓNS ÁS AGRUPACIÓNS DE PERSOAS
Limítanse os grupos para o desenvolvemento de calquera actividade ou evento de carácter familiar ou social na vía pública, espazos de uso público ou espazos privados, a un máximo de seis persoas, excepto no caso de persoas conviventes en que non se aplicará esta limitación e actividades organizadas que terán as súas limitacións de aforo e normas de seguridade propias.

ESTABLECEMENTOS DE HOSTALARÍA, RESTAURACIÓN E OCIO NOCTURNO
1. No interior : 50% do aforo. Non está permitido o consumo na barra. Non estará permitida a instalación de barras para consumo ou servizo nelas a clientes da terraza.
2. Nas terrazas ao aire libre, limitación ao 75 % das mesas.
3. A ocupación máxima será de 6 persoas por mesa ou agrupación de mesas, respectando a distancia mínima de seguridade interpersoal entre elas.
4. Os clientes poden quitar a máscara exclusivamente no momento do consumo.

https://www.boe.es/boe/dias/2020/11/04/pdfs/BOE-A-2020-13494.pdf

Bando polo 25 de xullo de 2020, día da Patria

2020-07-25T15:29:46Z

Veciños e veciñas, fieis acudimos á chamada das Irmandades da Fala que desde o ano 1920 celebran como data de reivindicación colectiva da Nosa Terra o 25 de xullo como Día da Patria Galega. Cen anos! Cen anos para celebrar e reivindicar pois como dicía o grande Castelao no seu célebre discurso no exilio chamado Alba de Groria estamos na Festa maor de Galiza, a Festa de todol-os galegos e galegas. Un centenario por tanto de demandas colectivas de autogoberno e de amor polo país que somos.

Este está a ser un ano especialmente difícil dominado por un coronavirus, o Covid, 19, que mudou todo. De entrada cunha letalidade que se asañou especialmente cos nosos maiores. Tamén cunha capacidade de infección que modificou hábitos sociais, movementos das persoas, a economía, a educación, o mundo laboral, a sanidade... Todo semella fondamente sinalado pola pandemia.

Mais á vez que se padeceu este episodio crítico tamén vimos como a sociedade galega deu mostras da súa afouteza: individualmente con mostras excepcionais de implicación desde os postos de traballo mantendo o tecido produtivo e de servizos á cidadanía. E socialmente, tecendo redes de solidariedade e apoio diante das dificultades para tentar que ninguén ficase excluído ou desatendido/a.

Parabéns e merecida homenaxe a todas esas persoas desde sanitarios/as, empregados públicos e privados, comerciantes de proximidade que estivestes ao pé dos vosos traballos facéndonos máis doada a vida nestes últimos meses dentro das dificultades do confinamento!

O 25 de xullo de 2020 ficará como unha data na que a festa cedeu espazo para unha vivencia responsábel e segura mais que non debe desmobilizarnos na procura dun país mellor. No camiño á nova normalidade deberemos manter esa ollada ao próximo que estivo ao noso carón, polo mantemento da capacidade produtiva do país perante o desmantelamento de empresas, pola defensa duns servizos públicos que malia os recortes foron quen de saír o paso da doenza. Que non pase que o único que se reforce o final sexa a banca ou a bolsa como aconteceu na crise anterior, co esforzo da xente mais co beneficio duns poucos.

Veciños e veciñas, poñamos bandeiras galegas nos balcóns de Rianxo e teñamos un Feliz 25 de xullo co corazón e a razón na terra, no mar, na nosa cultura e co noso idioma, mentres loitamos por un futuro que desexamos mellor e próspero para o noso país, vencendo o que nos tocou vivir.

Bando informativo sobre as fogueiras de San Xoán

2020-06-11T08:10:29Z

Por mor das medidas de contención da COVID-19, non se permiten, este ano, as fogueiras en espazos públicos.

Ampliación de prazo de solicitude do acollemento a local non tarifado para a taxa do lixo

2020-05-11T10:21:12Z

Amplíase o prazo ata o venres 15 de maio

Bando informativo sobre a taxa de lixo para locais comerciais durante a crise da COVID-19

2020-05-06T08:54:53Z

Os locais comerciais afectados pola crise da COVID-19 poden acollerse a un cambio de tarifa a outra máis vantaxosa durante o segundo cuadrimestre.

MDTL Declaración para a modificacion da tarifa da taxa do lixo a local non tarifado pola COVID-19

Bando informativo sobre a xestión de residuos durante a pandemia da COVID-19

2020-03-26T10:50:42Z

Bando informativo sobre as medidas sanitarias respecto dos residuos que deben tomar os fogares durante a corentena, especialmente de haber algún positivo en COVID-19.

Bando informativo sobre as medidas de contención da doenza COVID-19

2020-03-13T09:51:34Z

O Concello de Rianxo e a Xunta de Portavoces quere comunicar a súa veciñanza que vai tomar medidas de prevención e loita contra a pandemia do Coronavirus COVID-19 que estamos a sufrir.

A partir deste 13 de marzo todas as actividades municipais, deportivas, culturais e de servizos sociais quedan suspendidas durante os vindeiros 15 días, condicionado á evolución da enfermidade. Afectados os seguintes centros municipais: OFICINA DE TURISMO, INSTALACIÓNS DEPORTIVAS (PAVILLÓNS, PISCINA E CAMPOS DE FÚTBOL), AUDITORIO, CENTROS CULTURAIS, LICEO MARÍTIMO, BIBLIOTECA, MERCADILLO E MUSEOS.

Solicitamos a colaboración da veciñanza para que a atención ao publico nas dependencias municipais se limite a casos de extrema necesidade, chamando con anterioridade para concertar a presenza no concello e realización preferente dos trámites a través da sede electrónica municipal, https://sede.concelloderianxo.gal/ ou vía telefónica no 981860075.

Recoméndase por conseguinte a non celebración de actividades das asociacións e entidades do Concello durante os vindeiros 15 días, condicionado á evolución da enfermidade.

O concello pide a veciñanza a solidariedade e comprensión con estas e outras medidas, colabore na loita co virus, atendendo as recomendacións do Ministerio de Saúde, Consellería de Saúde e do Concello de Rianxo, o cal estará en constante comunicación e colaboración co SERGAS. Neste senso lembrar:

Non facer viaxes e desprazamentos que non se consideren imprescindibles, evitando a toda costa a zonas de máxima concentración do virus.
Non visitar centros de maiores, tanatorios, hospitais, centros médicos a excepción de casos de extrema necesidade.
Lavado con frecuencia das mans e cara con auga e xabón, e evite todo contacto físico con outras persoas e aglomeracións de xente.
Sigan as instrucións ditadas polo Ministerio de Sanidade e a Consellería de Sanidade, e no caso de ter algún síntoma contactar co 900 400 116.

O que se fai publico para o seu coñecemento e debido cumprimento

Bando polo 25 de xullo de 2019

2019-07-24T07:14:10Z

Veciños e veciñas, desde hai cen anos as Irmandades da Fala reunidas en Compostela fixaron o 25 de xullo como o Día da Patria Galega, unha xornada que un ano despois virou en festa e reivindicación colectiva da Nosa Terra. Na exposición do Consello da Cultura Galega, que tivemos até hai uns días exposta no Auditorio, vimos como un Castelao exiliado pronuncia nesta data o célebre discurso Alba de Groria en 1948 e onde sinala o 25 e xullo como a Festa maor de Galiza, a Festa de todol-os galegos e galegas.

Castelao lembra un país embandeirado de azul e branco, con músicas, gaitas, pandeiros e foguetes... evocando unha Santa Compaña de inmortaes galegos, figuras relevantes da súa Historia. Entre eles e moitos outros, o noso poeta Manuel Antonio ou Paio Gomes Charinho, Señor de Rianxo.

Unha Santa Compaña que desde o monte o mar percorre todo o país nas noites ao abeiro das árbores frondosas. E hoxe teríano difícil. Vale máis unha terra con árbores nos montes que un estado con ouro nos bancos dicía o propio Castelao. Ano tras ano a nosa riqueza forestal é atacada e con ela, en non poucas ocasións, o lume mesmo ameaza vivendas do noso concello. Asistimos a unha devastación que nos asola do alto da Paradegua a case chegar o mar. Así é que perdemos un dos nosos bens máis prezados: o monte. Alén dos valores económicos da masa forestal é incalculábel a perda do osíxeno rexenerado polas árbores, a biodiversidade que xera e que, apenas cunhas horas de desastre, de desleixo nunha torre de media tensión, botan por terra traballo de comuneiros e particulares e estraga anos de recursos, labores e coidados.

Estamos privando ás novas xeracións deste ouro da terra. Reclamamos unha nova estratexia que desde a prevención e a mudanza das especies a reforestar troque un modelo que non está máis que a producir incendios de xeito cíclico. Debemos deixar montes mellores para quen nos siga. É unha obriga natural.

Veciños e veciñas, penduremos bandeiras galegas nos balcóns de Rianxo e teñamos un Feliz 25 de xullo cargado de símbolos, de elementos de identidade, de reclamación de maior autogoberno, na nosa língua... Mais tamén defendamos ese monte que será o mellor legado para os nosos fillos e fillas. Teñen ese dereito.